,,სააკაშვილი არის ის პოლიტიკოსი, რომლის დაკავება უკრაინაში შეუძლებელია"

,,სააკაშვილი არის ის პოლიტიკოსი, რომლის დაკავება უკრაინაში შეუძლებელია" - დავით საყვარელიძე

პოლიტიკა - 16:54, 05 Dec, 2017

1843

მიხეილ სააკაშვილის თანაგუნდელი, უკრაინის პარტია "ახალი ძალების მოძრაობის" წევრი დავით საყვარელიძე უკრაინაში მიმდინარე პროცესებს ეხმაურება და აცხადებს, რომ საპროტესტო აქცია პერმანენტულ რეჟიმში გაგრძელდება.

"აქციები გაგრძელდება, ხალხი ძალიან გაბრაზებულია, მიხვდა, რომ რასაც ჩვენ ვაკეთებდით ეს არის სწორი. სააკაშვილი არის ის პოლიტიკოსი, რომლის დაკავება უკრაინაში შეუძლებელია. მიშა უკრაინელმა ხალხმა ათასობით სპეცრაზმელს ხელიდან გამოგლიჯა. ახლა ვიმყოფებით რადას შენობასთან, აქ ათასობით ადამიანია შეკრებილი და სამუშაო საათების დასრულების შემდეგ ეს რიცხვი გაიზრდება, რის შემდეგაც ვიმსჯელებთ როგორი იქნება ჩვენი სწრაფი ნაბიჯები საბოლოო გამარჯვებისთვის" - განაცხადა საყვარელიძემ.

სააკაშვილის თანაგუნდელმა უკრაინის შს მინისტრის იმ განცხადებასაც უპასუხა, სადაც ავაკოვმა სააკაშვილს მოუწოდა სისხლისღვრა აირიდოს თავიდან.

საყვარელიძის განცხადებით "სისხლისღვრას არავინ აპირებს".

"როდესაც რამდენიმეათასი გაბრაზებული ადამიანია ქუჩაში და ასევე ათასობით სპეცრაზმია, იქ ბუნებრივია გარკვეული ჩხუბები არის, თუმცა სისხლისღვრას არავინ აპირებს. ხელისუფლება აგონიაშია და ასეთ ნაბიჯებს არასდროს მოაქვს შედეგი. ხელისუფლება სუსტია და ამიტომ უნდათ ჩაახშონ ნებისმიერი მოძრაობა, რომელსაც ქვეყნის სათავეში უნდა მიშა. პოლიტიკური პროცესია, რასაც დრო და ნერვები მიაქვს, მაგრამ გამარჯვება ჩვენს მხარესაა"- თქვა მან.

საყვარელიძის თქმით, პოლიციასთან დაპირისპირების შედეგად 6 მხარდამჭერია დაკავებული, რომელთა გასათავისუფლებლად ყველაფერს აკეთებენ.