"პასუხები იყო გაუგებარი და ორაზროვანი"- აბესაძე გომელაურის მიერ მიწოდებული ინფორმაციით უკმაყოფილოა

პოლიტიკა - 10:15, 05 Dec, 2017

1320

თბილისში, ბერი გაბრიელ სალოსის ქუჩაზე ანტიტერორისტულ ოპერაციასთან დაკავშირებით სახელმწიფო სამსახურის ხელმძღვანელის მიერ მიწოდებული ინფორმაციით, უკმაყოფილოა ოპოზიცია. „ევროპული საქართველოს“ წევრის ირაკლი აბესაძის თქმით, გომელაურის პასუხები ორაზროვანი იყო და კითხვის ნიშნები დატოვა. აბესაძის განცხადებით ხელისუფლება რა რესურსსაც პოლიტიკური ოპონენტების დევნაზე ხარჯავს უმჯობესია, რომ ქვეყნის უსაფრთხოებას მოახმაროს:

„გაცემული პასუხების ნაწილი ტოვებდა კითხვის ნიშნებს და იყო გაუგებარი ჩვენთვის და ორაზროვანი. ზოგადად შეიძლება ითქვას, რომ ის დროითი თუ ადამიანური რესურსი, რასაც სპეცსამსახურები საქართველოში სამწუხაროდ ხარჯავენ პოლიტიკური ოპონენტების დევნაზე თუ თვალთვალზე, კარგი იქნებოდა, რომ ხმარდებოდეს ქვეყნის უსაფრთხოებას,“-განაცხადა ირაკლი აბესაძემ.

გუშინ პარლამენტში, ნდობის ჯგუფის შეხვედრაზე სახელმწიფოს უსაფრთხოების სამსახურის უფროს ვახტანგ გომელაურს თბილისში, ბერი გაბრიელ სალოსის ქუჩაზე ანტიტერორისტულ ოპერაციასთან დაკავშირებით მოუსმინეს

შეგახსენებთ, ბერი გაბრიელ სალოსის ქუჩაზე სპეცოპერაცია 22 ნოემბერს ჩატარდა. სპეცოპერაცია სუს-ის კონტრტერორისტულმა დეპარტამენტმა ჩაატარა.

ოფიციალური მონაცემებით, ლიკვიდირებულია სამი პირი, მათ შორის არის აჰმედ ჩატაევი. სპეცოპერაციის დროს დაიღუპა სუს-ის ერთი თანამშრომელი.