ხანძარი იყო ხულოს მუნიციპალიტეტში, სოფელ ტუნაძეებში. საგანგებო სიტუაციების მართვის სააგენტოს ინფორმაციით, შემთხვევის შედეგად არავინ დაშავებულა. ხანძარი ამ დროისთვის ლიკვიდირებულია.

ხანძრის შედეგად სამი შენობა დაიწვა, აქედან ორი საცხოვრებელი სახლი. მესამე შენობა კი ტუნაძეებში ახალი სკოლის მშენებლობამდე, სკოლისთვის გამოყოფილი ალტერნატიული ფართი იყო.

"სოფელ ტუნაძეების საჯარო სკოლაში 107 ბავშვი სწავლობს, რომელთა გადანაწილება მოხდება ან ახლო მდებარე სკოლაში, ან ახალ ალტერნატიულ ფართში. მოსწავლეთა სხვა სოფელში გადანაწილების შემთხვევაში, მოხდება მათი ტრანსპორტით უზრუნველყოფა. მომხდარის გამო, რამდენიმე დღე სასწავლო პროცესი შეწყდება" , - ნათქვამია აჭარის მთავრობის ფეისბუქგვერდზე გავრცელებულ განცხადებაში.

ჯერჯერობით უცნობია ხანძრის გამომწვევი მიზეზი. სალიკვიდაციო სამუშაოებში 5 სახანძრო-სამაშველო სამსახურის 5 ჯგუფი იყო ჩართული.