თბილისში ჩატარებულ ანტიტერორისტულ სპეცოპერაციასთან დაკავშირებით სუს-ის მიერ გავრცელებულ ინფორმაციას, რომ სპეცოპერაციისას ლიკვიდირებულებიდან ერთ-ერთი, საერთაშორისო ტერორიზმში ბრალდებული ახმედ ჩატაევია, საპარლამენტო უმრავლესობა ეხმაურება. ლევან გოგიჩაიშვილი ჩატაევის საკითხზე პასუხისმგებლობას ყოფილ ხელისუფლებას აკისრებს და კითხვები აქვს იმასთან დაკავშირებით, თუ რატომ მოხდა თავდაპირველად ჩატაევის საქართველოში ჩამოყვანა:

„რატომ ჩამოიყვანა სააკაშვილის ხელისუფლებამ თავის დროზე ძებნილი ჩატაევი უკრაინიდან, მაშინ როდესაც საქართველოში მის წინააღმდეგ საქმე აღძრა თუ არ ვცდები განზრახ მკვლელობაზე, შემდეგ ჩამოიყვანა ეს ადამიანი და გაუშვა.“- განაცხადა ლევან გოგიჩაიშვილმა.

გოგიჩაიშვილის თქმით ის ვერ აიღებს პასუხისმგებლობას იმის გამო, რომ ჩატაევის ციხიდან გათავისუფლება იმ გუნდის მიერ მოხდა, რომელსაც ის ამჟამად წარმოადგენს. მისი თქმით ჩატაევის გათავისუფლების დროს, თავად ის პატიმარი იყო:

„ეს კითხვა დაუსვით მაშინ ვინც იყო გენერალური პროკურორი. ჩატაევი რომ ციხიდან გამოვიდა მე ციხეში ვიყავი. შესაბამისად ამაზე პასუხს მე ვერ გაგცემთ. “- განაცხადა გოგიჩაიშვილმა.