გეი ქორწინება უკანასკნელი დღეების განმავლობაში საქართველოში განსაკუთრებული განხილვის საგანი გახდა - სოციალური ქსელის მომხმარებელთა უმეტესობა ლგბტ ქორწინების დროს ქართული ჩოხის ჩაცმას გმობს. აღნიშნულს სოციალური ქსელითვე პოლიტოლოგი გია ნოდიაც ეხმაურება:

„ჩოხიანმა ჰომო-ქორწილმა მაფიქრებინა: გეი რომ ვყოფილიყავი და თან ოფიციალური ქორწილი მქონოდა, მეც, ალბათ, ჩოხის ჩაცმა მომინდებოდა, მაგრამ რა ვქნა: რაკი მოსაწყენი და ბანალური ჰეტერო ვარ, ორივე ჩემს ქორწილში მოსაწყენი და ბანალური კოსტუმით გამოვცხადდი.

მინდა, საიდუმლოდ ვუთხრა იმ ხალხს, ვინც ძალიან გააბრაზა ჩოხიანი სიძე-სიძის ხილვამ: ამ ხალხმა ჩოხა სწორედ იმისთვის ჩაიცვა, რომ თქვენ ამაზე ავარდინილიყავით და მერე იმათ თქვენს ავარდნაზე ეკაიფათ. ხოდა, თუ არ გინდათ, რომ „პიდარასტების“ ჭკუაზე იაროთ, გირჩევნიათ ჩუმად დაიბოღმოთ ან, თუ მაინცდამიანც, დახურულ ჯგუფებში გამოხატოთ აღშფოთება“, - წერს ნოდია.