საქართველოს შინაგან საქმეთა მინისტრი, საპატრულო პოლიციის უფროსთან ერთად, თბილისის მერს შეხვდა. შეხვედრაზე თბილისის საცობებისგან განტვირთვაზე ისაუბრეს. როგორც გახარიამ აღნიშნა, დაიგეგმა კოორდინაციის ის მექანიზმები, რომელიც კარგად იმუშავებს და ქალაქის განტვირთვის გარანტი იქნება.

„ჩვენ დავგეგმეთ ის კოორდინაციის მექანიზმები, რომლებმაც ძალზედ ეფექტურად უნდა იმუშაონ და ჩვენი თანამშრომლები გავაცანით ერთმანეთს და დავუსახეთ ის ამოცანები, რომლებიც მათ უახლოეს პერიოდში უნდა გადაწყვიტონ. რა თქმა უნდა, ეს არის ყველაზე თვალსაჩინო და მნიშვნელოვანი ჩვენი მოქალაქეებისთვის, როგორიც გახლავთ ტრაფიკი თბილისში, ტრაფიკთან დაკავშირებული თემები, სადისტრიბუციო მანქანების მოძრაობა, საზოგადოებრივი ტრანსპორტის მოძრაობის მოწესრიგება, ქვეითების მოძრაობის მოწესრიგება,“ - განაცხადა შს მინისტრმა გიორგი გახარიამ.

კახა კალაძის განცხადებით კი ნარჩენების გატანასთან დაკავშირებით გეგმა უახლოეს მომავალში იქნება.

„მერიამ უკვე "თბილსერვისს" და მის ხელმძღვანელს დაავალა, რომ უახლოეს მომავალში წარმოადგინონ ნარჩენების გატანის გეგმა. განსაკუთრებით ღამის საათებში მოხდეს, რომ არ შეიზღუდოს მოძრაობა დღის განმავლობაში. ასევე დღეს ჩვენ გვქონდა საუბარი შს სამინისტროსთან, რომ დავიწყოთ მოლაპარაკებები სადისტრიბუციო კომპანიებთან, რათა დღის განმავლობაში არ მოხდეს დიდი მანქანების შემოსვლა ქალაქში,“ - აცხადებს დედაქალაქის მერი კახა კალაძე.