საქათველოს პარლამენტი 2017 წლის სახელმწიფო ბიუჯეტში დაგეგმილ ცვლილებებს განიხილავს. საქართველოს ფინანსთა სამინისტროს ინფორმაციით, იგეგმება მიმდინარე წლის ბიუჯეტის 305 მილიონი ლარით გაზრდა.

მმართველ გუნდში აცხადებენ, რომ ფულადი რესურსი დაუგეგმავი ეკონომიკური ზრდის შედეგად დაგროვდა.

„ეკონომიკური ზრდა ჩვენ გვაქვს გაცილებით მაღალი, ვიდრე ეს იყო ბიუჯეტის დაგეგმვის დროს. მაღალმა ეკონომიკურმა ზრდამ მოგვცა ჩვენ დამატებითი შემოსავლები მიმდინარე წელს. შესაბამისად, იზრდება ბიუჯეტის საგადასახადო შემოსავლები და ასევე იზრდება ბიუჯეტის ხარჯვითი ნაწილი, რაც ძირითადად მოხმარდება 2018 წელს დაგეგმილ ღონისძიებებს,“ - განაცხადა ფინანსთა მინისტრის მოადგილემ გიორგი კაკაურიძემ.

საბიუჯეტო მონაცემების მანიპულაციებზე საუბრობს „ნაციონალური მოძრაობა“.

„ეს ფული აიღეს პირდაპირ ძველი ნაშთებიდან და მანამდე ამას არ ჰკიდებდნენ ხელს, იმის გამო, რომ მას შეეძლო ძალიან ცუდი ზემოქმედება მოეხდინა თუნდაც ფასებზე და ლარის კურსზე. ეს არის ფაქტობრივად მანიპულაციები საბიუჯეტო მონაცემებით, რაც საბოლოო ჯამში, კიდევ უფრო ამძიმებს მომავალი წლის მაკროეკონომიკურ მდგომარეობას,“ - ამბობს "ენმ"-ის წევრი რომან გოცირიძე.