აფხაზ მეომართა მემორიალი შოტლანდიაში ძველ ადგილს უცვლელად დაუბრუნდება

პოლიტიკა - 16:31, 30 Nov, 2017

2472

აღმოსავლეთ ეირშირის (შოტლანდია) საბჭომ გამოაქვეყნა განცხადება, რომელშიც აღნიშნულია, რომ შოტლანდიის ქალაქ კილმარნოკში აღებული აფხაზ მეომართა ხსოვნისადმი მიძღვნილი მემორიალი ძველ ადგილზე უცვლელად დაბრუნდება, ამავე დროს საბჭო თვლის, რომ უნდა შემუშავდეს ქვაზე დასატანი, ყველა მხარისთვის მისაღები, უნივერსალური ტექსტი და გაგრძელდეს დიალოგი. განცხადებაში აღნიშნულია, რომ მემორიალი ეძღვნება კონფლიქტში მონაწილე არა რომელიმე ერთ მხარეს არამედ, კილმარნოკის დაძმობილებულ ქალაქ სოხუმში ომის დროს დაღუპულთა ხსოვნას.

ქართულმა მხარემ აღნიშნული მემორიალის დემონტაჟის საკითხი ნოემბერში დააყენა. შოტლანდიის მთავრობასთან გამართულ კონსულტაციებში საქართველოს საგანგებო და სრულუფლებიანი ელჩი თამარ ბერუჩაშვილი პირადად მონაწილეობდა. მემორიალის დემონტაჟი 10 ნოემბერს მოხდა. მემორიალის აღებას აფხაზური მხარის ნეგატიური რეაქცია მოჰყვა. დე ფაქტო აფხაზეთის საგარეო საქმეთა სამინისტროს მიერ გავრცელებულ მიმართვაში ქართული მხარის ნაბიჯები შეფასდა „როგორც ვანდალიზმის აქტის ხელშეწყობა და თანამედროვე ისტორიის ობიექტური ფაქტების ფალსიფიცირების მცდელობა“.