შსს-ს სახელმწიფო უსაფრთხოების სააგენტოს თბილისის მთავარ სამმართველოსა და მოგვიანებით, სასჯელაღსრულების დეპარტამენტის ყოფილი თავმჯდომარე, დიმიტრი დარბაისელი საქართველოდან გაიქცა.

ამის შესახებ „ფეისბუქის“ საკუთარ გვერდზე ჟურნალისტი ელისო კილაძე წერს. „ქრონიკა პლიუსის“ რედაქტორის თქმით, დარბაისელი თავშესაფარს მოითხოვს და შემდეგ დაწვრილებით მოყვება სხვადასხვა საკითხებს, მათ შორის ვანო მერაბიშვილის საკნიდან გაყვანის ამბავს:

“დიმა დარბაისელი ქვეყნიდან გაიქცა.

ჩემი წყარო ამბობს,თავშესაფარს მოითხოვს და წვრილად მოყვება ყველაფერს,მათ შორის ვანოს საკნიდან გაყვანის ამბებსაცო!”, - წერს ელისო კილაძე.

დიმიტრი დარბაისელზე საუბრობდა ვანო მერაბიშვილი თავის განცხადებაში, რომელის საკნიდან გაყვანის შემდეგ გაავრცელა:

„სავარაუდოდ, ციხიდან გამოსასვლელიდან, ვერ ვადასტურებ, სახეზე გადაფარებული მქონდა, ჩაწოლილი ვიყავი მანქანაში, არის ქალაქის ვიდეოკამერები, მახსოვს კაბინეტიც, თავისუფლად შემიძლია ამოვიცნო ის ორი ადამიანი, ვინც ჩემს გვედრით იჯდა, სპეციფიკური სახეები ჰქონდათ და არ ამერევა, მეორე ადამიანს, ვინც იყო იმ ოთახში, მე მას ვიცნობ. ის პოლიციაში მუშაობდა, მან შემახსენა, რომ ის არის ერთი ჩემი მეგობრის შვილის ნათლია, არ არის გამორიცხული, რომ ის იყოს სასჯელაღსრულების დეპარტამენტის უფროსი, დარბაისელი. მე ვთხოვე ჩემს ადვოკატებს, რომ მოეტანათ სურათები ამ ადმიანის, ეს სურათი ვერ მოვიპოვე დაზუსტებით ვერ გეტყვით.

ეს დარბაისელი იყო ბოლომდე გაბრუებული ნარკოტიკებით და საკუთარ თავს ვერ აკონტორლებდა. რომ შევედი, ამ ადამიანმა დაიწყო აქტიური გინება გიორგი ონიანის, მუქარები და ასე შემდეგ, მე გამიკვირდა რა შუაში იყო ონიანი ჩემთან, მე მივხვდი, რომ მას ქუჩური გარჩევები სურდა, შემდეგ პროკურორმა მას შეუსწორა და უთხრა, რომ ონიანი ბაჩოს ადვოკატია და არა ვანოსიო, ის იმდენად იყო „კაიფში“, რომ სამჯერ თქმა დასჭირდა. სიმართლე გითხრათ, დიდი ხანია არ მქონია „ბედნიერება“ იმისა, რომ მე იმ ოთახში ვყოფილიყავი, სადაც ნარკოტიკებით გაბრუებული ადამიანი იყო“, - აღნიშნავდა ვანო მერაბიშვილი.