ბერი გაბრიელ სალოსის ქუჩაზე მდებარე ბინის მფლობელი, სადაც თავს ტერორისტები აფარებდნენ, აცხადებს, რომ აღნიშნულის შესახებ ინფორმაციას არ ფლობდა. თინა გაუგაშვილი ტელეკომპანია „იბერიასთან“ საუბრისას ამბობს, რომ მისთვის გაუგებარია, თუ როგორ მოხვდნენ ტერორიზმში ბრალდებული პირები მის საცხოვრებელ ბინაში.

„არავინ დამკავშირებია, როგორც ჩემმა ბიჭმა მითხრა, მაგის ცოლის ძმასთან მისულან ცოლ-ქმარი და ორი ბავშვი, უთქვამთ, რომ ექიმთან იყვნენ გამოკვლევაზე ჩამოსულები, ვიცოდი, რომ ბინა თავისუფალი იყო, დღემდე შოკში ვარ, არ ვიცი, ეს ხალხი საიდან აღმოჩნდა მაგ ბინაში, ჩემმა ბიჭმა მისცა გასაღები, ორი კვირაც არ არის, რაც ცხოვრობდნენ, მაგ ხალხთან ურთიერთობა არ მქონია“, - აღნიშნავს გაუგაშვილი.

ბინის მფლობელი უარყოფს ინფორმაციას , რომ აღნიშნულ საცხოვრებელ სახლში პირები ადრეც დააკავეს:

„სხვა დროს სპეცოპერაციას ჩემს ბინაში ადგილი არ ჰქონია, არაფერში ვარ დამნაშავე, იმის მეშინია, რომ ჩამოვალ და არ შემომიშვებენ“, - აღნიშნა „იბერიასთან“ საუბრისას გაურგაშვილმა.