დედაქალაქის ვიცე-მერი ირაკლი ხმალაძე კახა კალაძესა და გიგა ნიკოლეიშვილს შორის შესაძლო დაპირისპირებას კატეგორიულად უარყოფს. ჟურნალისტებთან საუბრისას ხმალაძემ აღნიშნა, რომ ნიკოლეიშვილმა უკეთესი შეთავაზება მიიღო და სხვა სამსახურში გადავიდა:

„კატეგორიულად უნდა უარვყო დაპირისპირება, ეს აბსურდია. ერთადერთი მიზეზი, რის გამოც ბატონმა გიგამ თანამდებობა დატოვა, ისაა, რომ ის დაინიშნა დაცვის პოლიციის დეპარტამენტის ხელმძღვანელად და მხოლოდ და მხოლოდ ამ მიზეზის გამო დატოვა მერია. დაპირისპირება არ ყოფილა. როგორ უნდა მოგვესწრო დაპირისპირება 1 კვირაში, ეს, პრაქტიკულად, გამორიცხული იყო. ბატონ გიგას ჩვენ დიდ პატივს ვცემთ, ძალიან დიდი სურვილი გვქონდა, ერთად გვემუშავა, მაგრამ მან უფრო საპასუხისმგებლო პოზიცია ჩაიბარა და მინდა, წარმატებები ვუსურვო. რომ გვცოდნოდა, არ იქნებოდა ეს გადაწყვეტილება მიღებული და არ მოხდებოდა მისი მერის მოადგილედ დანიშვნა, თუმცა მოხდა მოკლე დროში მისი წარდგენა ამ თანამდებობაზე . ვინ იქნება მისი ადგილმონაცვლე, არ ვიცით, არის მერის მოადგილის ორი ვაკანსია და ამასთან დაკავშირებით ვერ გავაკეთებ განცხადებას", - განაცხადა ირაკლი ხმალაძემ.