მოსკოვი საქართველოსა და ნატოს წევრ ქვეყნებს შორის სამხედრო თანამშრომლობის გაღრმავების გამო შეშფოთებას კიდევ ერთხელ გამოთქვამს. ლავროვის უწყება აღნიშნულის შესახებ განცხადებას ავრცელებს.

„რუსულმა მხარემ კვლავ გააკეთა აქცენტი იმ საშიშროებაზე, რომელსაც თბილისის მხრიდან ნატო-ს წევრ ქვეყნებთან სამხედრო ურთიერთობა ქმნის. ცოტა ხნის წინ, აშშ-ის სახელმწიფო დეპარტამენტმა და პენტაგონმა დაამტკიცა შეთანხმება თბილისისთვის რაკეტსაწინააღმდეგო სისტემების „ჯაველინების“ მიწოდების შესახებ. ეს 2008 წლის შემდეგ ამ მასშტაბის პირველი სამხედრო შეთანმხებაა ამერიკის შეერთებულ შტატებთან. ამასთანავე, აშშ-მ შეცვალა თავისი პროგრამა ქართველი ჯარისკაცების სწავლების კუთხით საბრძოლო ერთეულების მომზადებით. ამერიკის დახმარებით საქართველოს ტერიტორიაზე ახალი სამხედრო-სასწავლო ცენტრის მშენებლობა იგეგმება. რუსეთი ასეთ მასშტაბურ სამხედრო მხარდაჭერას აღიქვამს, როგორც თბილისისთვის ბიძგის მიმცემს ახალი საშიში ავანტურისკენ რეგიონში“, - ნათქვამია რუსეთის საგარეო საქმეთა სამინისტროს განცხადებაში.

აღნიშნულს ანალიტიკოსები აფასებენ და აცხადებენ, რომ შესაძლოა ადგილი ჰქონდეს გარკვეულ პროვოკაციებს და ოკუპირებულ ტერიტორიებზე ვითარების გართულებას:

“რუსეთი არის საქართველოს სახელმწიფოებრიობის მთავარი საფრთხე, ხოლო ამერიკის შეერთებულ შტატებთან სამხედრო სფეროში თანამშრომლობა არის ერთ-ერთი მნიშვნელოვანი ფაქტორი ამ საფრთხის შესაკავებლად. რუსეთი შეეცდება პროვოკაციების მოწყობას, თუმცა ეს გადაწყვეტილება, რომელსაც სამხედრო კუთხით დიდი მნიშვნელობა აქვს, აქვს დიდი მნიშვნელობა პოლიტიკურადაც. ეს ნიშნავს, რომ აშშ უშუალოდ არის დაინტერესებული და მისი საგარეო პოლიტიკის სასიცოცხლო ინტერესებშია, რომ საქართველო იყოს დაცული ქვეყანა,“ - აცხადებს საქართველოს ატლანტიკური საბჭოს ვიცე პრეზიდენტი ბათუ ქუთელია.