თბილისის ახალი მერის მოადგილის გიგა ნიკოლეიშვილის თანამდებობიდან გადადგომის შესახებ საკრებულოს ოპოზიციის რიგებში კომენტარები კეთდება. დეპუტატების განცხადებით, ნიკოლეიშვილის შინაგან საქმეთა სამინისტროში გადასვლა მის ე.წ. ოდეერობას ადასტურებს.

„მისი გადადგომა უნდა უკავშირდებოდეს იმ საკანონმდებლო ცვლილებას, რომლის მეშვეობითაც სუს-ი თამამად შეძლებს სხვადასხვა თანამდებობებზე ადამიანების დანიშვნას. გიგა ნოკოლეიშვილი ცნობილი ოდეერი იყო დედაქალაქის მერიაში, ახლა უკვე მის ადგილას სავარაუდოდ, დაინიშნება არაცნობილი ადამიანი, რომლის კანონიერი უფლებაც ექნება სუს-ს. შესაბამისად, შესაკრებთა გადანაცვლებით ჯამი არ იცვლება,“ - განაცხადა თბილისის საკრებულოს ფრაქცია "ერთიანი ნაციონალური მოძრაობის" წევრმა ლევან ხაბეიშვილმა.

„ევროპული საქართველოს“ რიგებში არ გამორიცხავენ, რომ კახა კალაძის მერიაში სუს-ის სხვა წარმომადგენლის ინტეგრირება მოხდება.

„როდესაც მთავრობა იცვლებოდა, ჩვენ კალაძეს ვეუბნებოდით, რომ ეს ადამიანი სუს-ის მიერ მის საკონტროლებლად იყო დანიშნული, აგრეთვე ვეუბნებოდით, რომ იმ გუნდის წარმომადგენელმა, რომელმა გუნდმაც ვერცერთი საკვანძო საკითხი ვერ მოაგვარა და მნიშვნელოვანი პრობლემა შეუქმნა თბილისს, ეს ადამიანები გაეთავისუფლებინა. კარგია, რომ კალაძემ მიიღო გადაწყვეტილება და ის ადამიანი გაათავისუფლა, რომელიც სუს-ის მიერ მის საკონტროლებლად იყო დანიშნული, მაგრამ ეს საკმარისი არ არის,“ - აცხადებს "ევროპული საქართველო - მოძრაობა თავისუფლებისთვის" წევრი დავით ჟღენტი.

ოპონენტებისგან განსხვავებით კითხვები არ აქვს მმართველ გუნდს:

„გადავიდა სხვა სამსახურში სამუშაოდ, რამდენადაც მე ვიცი. სადაც ერჩივნა და სადაც თავის თავს უკეთ ხედავდა, გადავიდა სამუშაოდ. მე მგონი ეს ჩვეულებრივი მოვლენაა. დაპირისპირებას გამოვრიცხავ,“ - განაცხადა თბილისის საკრებულოს ფრაქცია ”ქართული ოცნება - დემოკრატიული საქართველოსთვის” თავმჯდომარემ ბექა დავითულიანმა.