ოპოზიცია ექსპრემიერ ვანო მერაბიშვილის დაუყოვნებლივ გათავისუფლებას ითხოვს. მოთხოვნა ევროპის ადამიანის უფლებათა სასამართლოს დიდი პალატის გადაწყვეტილებამ კიდევ უფრო გაამყარა.

„ევროპული საქართველოს“ წევრი ოთარ კახიძე ამბობს, რომ გადაწყვეტილებამ მერაბიშვილის პოლიტპატიმრობა დაადასტურა.

„მერაბიშვილი არის პოლიტიკური პატიმარი, შესაბამისად, ხელისუფლებას მოუწევს გაითვალისწინოს ახალი რეალობა, ვინაიდან, სტრასბურგის სასამართლოს დიდი პალატა არის უმაღლესი ინსტანცია, ამ გადაწყვეტილებას ვეღარ გაასაჩივრებენ და მერაბიშვილი უნდა გაათავისუფლოს,“ - განაცხადა „ევროპული საქართველოს“ წევრმა ოთარ კახიძემ.

„ნაციონალური მოძრაობის“ თქმით, ყურადღებით დააკვირდებიან, რას მოიმოქმედებს საქართველოს პრეზიდენტი.

„ეს არის ფაქტობრივად პოლიტპატიმრად გამოცხადება. ინტერესით ვუყურებ რას გააკეთებს საქართველოს პრეზიდენტი, რომელსაც აქვს იმის პრეტენზია, რომ არ იყოს იანუკოვიჩზე უარესი მაინც,“ - აცხადებს "ენმ"-ის წევრი გიორგი ბარამიძემ.

მმართველი გუნდი კი მიიჩნევს, რომ ადამიანის უფლებათა ევროპული სასამართლოს დოკუმენტში არ არის საუბარი პოლიტიკურ დევნაზე და ასევე არ წარმოიშვება მერაბიშვილის გათავისუფლების ვალდებულება.

„ვერ წარადგინეს მყარი მტკიცებულება იმისა, რომ ნამდვილად მოხდა საკნიდან გაყვანა, თუმცა, სახელმწიფოს ინტერესების დამცველმა შესაბამისმა უწყებებმაც ვერ დაასაბუთა ის, რომ აპრიორი ამ ყველაფერს ადგილი არ ჰქონია. არცერთ შემთხვევაში ეს გადაწყვეტილება არ ნიშნავს იმას, რომ ხდება ან უნდა მოხდეს ბატონი მერაბიშვილის გათავისუფლება,“ - ამბობს „ქართული ოცნების“ წევრი ანრი ოხანაშვილი.