აშენდება თუ არა ვერეს ხეობაში 10-სართულიანი სასტუმრო - მერიაში აცხადებენ, რომ მშენებლობის ნებართვა არ გაცემულა

პოლიტიკა - 14:45, 28 Nov, 2017

1445

ვერეს ხეობაში 10-სართულიანი სასტუმროს ასაშენებლად ზონალური ნებართვა გაიცა, ამის შესახებ გუშინ სოციალურ ქსელში ,,ნაციონალური მოძრაობის" თბილისის საკრებულოს წევრი ნიკა ვაჩეიშვილი წერდა.
როგორც ცნობილია კომისიის 10 წევრიდან 5-მა დაუჭირა მხარი, 4 წინააღმდეგი იყო, ერთმა წევრმა კი შუალედური დასკვნა დადო. განმცხადებელ ივანე თაბაგარს ადგილზე მინიმუმ 50-ნომრიანი სასტუმროს აშენება სურს.

„ნიუპოსტი“ საკითხის გასარკვევად თბილისის არქიტექტურის სამსახურის წარმომადგენელს ქართლოს თეთრაულს დაუკავშირდა, რომელმაც განაცხადა, რომ მშენებლობის ნებართვა არ არის გაცემული, თუმცა ზონალური საბჭოს დადებითი რეკომენდაციის საფუძველზე გაიცა მიწის ნაკვეთის სამშენებლოდ გამოყენების პირობები.

ზონალური საბჭოს გადაწყვეტილების კანონიერებას კი ამ დროისათვის არქიტექტურის სამსახური შეისწავლის და შედეგები მოგვიანებით გახდება ცნობილი:

„ამ ტერიტორიაზე თბილისის არქიტექტურულ სამსახურს არქიტექტურული პროექტი არ შეუთანხმებია, არც მშენებლობის ნებართვაა გაცემული, ზონალური საბჭოს დადებითი რეკომენდაციის საფუძველზე გაიცა მიწის ნაკვეთის სამშენებლოდ გამოყენების პირობები, რომლის კანონიერებასაც სწავლობს ამჟამად სამსახური და შედეგები გახდება ცნობილი“, - განაცხადა „ნიუპოსტთან“ საუბრისას ქართლოს თეთრაულმა.