„დღეს არსებობს გარემოებები, რომ სახალხო დამცველი თავისუფალი იყოს პოლიტიკური ჩარევისგან“- ლომჯარია

პოლიტიკა - 12:07, 28 Nov, 2017

1036

სახალხო დამცველის თანამდებობაზე წარდგენილი ნინო ლომჯარია საქართველოს პარლამენტში იმყოფება. ლომჯარია ადამიანის უფლებების დაცვის კუთხით საკუთარ ხედვებს საპარლამენტო უმრავლესობაში შემავალი ფრაქციებს, ადამიანის უფლებათა დაცვის და სამოქალაქო ინტეგრაციის კომიტეტებს გააცნობს:

„წარმოვადგენ ადამიანის უფლებების დაცვის ჩემს ხედვას, თუ როგორ ვაპირებ განვავითარო სახალხო დამცველის საქმიანობა და აპარატი. განსაკუთრებით ყურადღებას გავამახვილებ იმ უფლებებზე, რაც საზოგადოებას აწუხებს. განსაკუთრებით აღსანიშნავია ის თემები, რაც დრომ მოიტანა. ყურადღებას გავამახვილებ იმ ადამიანების უფლებებზე, რომელთა ხმა შედარებით ნაკლებად ისმის სხვადასხვა გარემოების გამო. მაგალითად, იმის გამო, რომ არ ჰყავთ აქტიური და მობილიზებული მხარდამჭერები სამოქალაქო საზოგადოებაში. ამიტომ, სახალხო დამცველი იმ ადამიანების ხმა იქნება, რომელთა ხმა ნაკლებად ისმის საზოგადოებაში“, -განაცხადა ნინო ლომჯარიამ.

ლომჯარიას განმარტებითვე, სახალხო დამცველის დამოუკიდებლობის გარანტი საქართველოს კონსტიტუციაა, შესაბამისად, ის პოლიტიკური ჩარევისგან დამოუკიდებელი უნდა იყოს:

„საქართველოს კონსტიტუციითა და მოქმედი კანონმდებლობით სახალხო დამცველს აქვს ძალიან მაღალი დაცვის გარანტია. ამიტომ ვფიქრობ, რომ ამ ვითარებაში, როდესაც კიდევ უფრო გაძლიერდა კონტროლის მექანიზმები ადამიანის უფლებათა დაცვის თვალსაზრისით, ნამდვილად არსებობს ის გარემოებები, რომ სახალხო დამცველს შეუძლია, დამოუკიდებლად მიიღოს გადაწყვეტილებები და თავისუფალი იყოს პოლიტიკური ჩარევისგან. დარწმუნებული ვარ, სახალხო დამცველის აპარატი და მეც, ჩემი არჩევის შემთხვევაში, შევძლებ, გავუმკლავდე მსგავსი ტიპის გამოწვევებს”, – აღნიშნა ნინო ლომჯარიამ.