საქართველოს პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი აცხადებს, რომ სახელმწიფო უსაფრთხოების სამსახური მზადყოფნას გამოთქვამს, რომ თბილისში ჩატარებულ სპეცოპერაციასთან დაკავშირებით ნდობის ჯგუფის წინაშე წარდგეს. ამის შესახებ სესიაშვილმა კომენტარი ნდობის ჯგუფის სხდომის დასრულების შემდეგ გააკეთა:

"ვისაუბრეთ, მათ შორის სპეცოპერაციასთან დაკავშირებით. მე მინდა დავადასტურო, რომ სახელმწიფო უსაფრთხოების სამსახური მზადყოფნას გამოთქვამს, წარდგეს პარლამენტის წინაშე, ნდობის ჯგუფის წინაშე და გააცნოს პირველადი ინფორმაცია ჩატარებული ოპერაციის და მოვლენის შესახებ”, - განაცხადა სესიაშვილმა.

ჯერჯერობით უცნობია, როდის შედგება აღნიშნული შეხვედრა, საპარლამენტო უმრავლესობის წარმომადგენელი კომენტარს არც შეხვედრის ფორმატზე აკეთებს.

„მოგვიანებით შეგატყობინებთ, მას შემდეგ, რაც სახელმწიფო უსაფთხოების სამსახურს ექნება დადასტურებული ინფორმაცია", - განაცხადა სესიაშვილმა.

ამასთან, საპარლამენტო უმცირესობა თვლის, რომ თბილისში ჩატარებულ სპეცოპერაციასთან დაკავშირებით არსებულ კითხვებს ხელისუფლებამ პასუხი საჯაროდ უნდა გასცეს. „ევროპული საქართველოს“ წევრის, ირაკლი აბესაძის თქმით, ამ მიზნით საპარლამენტო უმცირესობა პარლამენტში იბარებს სახელმწიფო უსაფრთხოების სამსახურის ხელმძღვანელს და იუსტიციის მინისტრს. აბესაძის განცხადებითვე, გომელაური მზადაა, რომ შეკითხვებზე პასუხი ნდობის ჯგუფის ფორმატში გასცეს

„როგორც ჩანს, სუს-ის ხელმძღვანელი თანახმაა, რომ ნდობის ჯგუფის ფორმატში გასცეს შეკითხვებს პასუხი და შესაბამისად, დაზუსტდება თარიღი და დრო, როდის შეძლებს ბატონი გომელაური მოსვლას. კიდევ ერთხელ ხაზს გავუსვამ ამ შეკითხვებს: როგორ მოხვდნენ ტერორისტები თბილისში, როგორ აღმოჩნდა ამ რაოდენობის იარაღი და როგორ ჩატარდა სპეცოპერაცია? მიგვაჩნია, რომ პასუხები უნდა ყოფილიყო საჯარო. მიუხედავად ამისა, რა თქმა უნდა, ნდობის ჯგუფის ფარგლებში ჩვენ მოვუსმენთ ბატონ გომელაურს და დავსვამთ ყველა იმ საჭირო შეკითხვას, რაც საზოგადოებას აინტერესებს.“- განაცხადა ირაკლი აბესაძემ.