ახმედ ჩატაევის საქართველოში შესაძლო შემოსვლა და ჩატარებული სპეცოპერაცია - ოპოზიციას ხელისუფლებასთან კითხვები აქვს. საპარლამენტო უმცირესობა მმართველი გუნდის და სამართალდამცავი ორგანოების კომპეტენტურობას კითხვის ნიშნის ქვეშ აყენებს.

“თუ აღმოჩნდება, რომ ეს გარდაცვლილი მართლაც ახმედ ჩატაევია და მან მოახერხა საქართველოს ტერიტორიაზე შემოსვლა, ეს ნამდვილად თითოეულ მოქალაქეს აფიქრებინებს, რომ ისინი დაუცველები არიან და ძალიან ბევრ ეჭვებს აღძრავს ჩვენი სამართალდამცავი ორგანოების უნარიანობასა და კომპეტენციასთან დაკავშირებით,“ - განაცხადა „ევროპული საქართველოს“ წევრმა ზურაბ ჭიაბერაშვილმა.

„ნაციონალური მოძრაობისთვის“ გაუგებარია, როგორ ვერ შეამჩნია ახმედ ჩატაევის ქვეყანაში შემოსვლა კონტრდაზვერვის სამსახურმა:

„ეს ადამიანი როგორ აღმოჩნდა საქართველოში, არსებობს თუ არა კონტრდაზვერვა, არსებობს თუ არა შესაბამისი სტრუქტურები, რომლებმაც უნდა უზრუნველყონ, რომ ასეთი ტიპის, მითუმეტეს ცალხელა და ცალფეხა ადამიანი ვერ შემოვიდეს ჩვენს ქვეყანაში. ეს იმას ნიშნავს, რომ ქვეყანაში საერთოდ მოშლილია ყველა შესაბამისი სტრუქტურა, რომელმაც ჩვენი ქვეყნის უსაფრთხოება უნდა უზრუნველყოს,“ - აცხადებს გია ბარამიძე.

ოპოზიციას მმართველი გუნდი პასუხობს და ურჩევს, გამოძიების შედეგებს დაელოდოს:

„კითხვები ბუნებრივია, არა ერთია, როგორც საზოგადოებაში, ასევე პოლიტიკურ წრეებს შორის, თუმცა მე ვფიქრობ, საკითხის აქტუალობიდან გამომდინარე, სპეცოპერაციის მნიშვნელობიდან და მასშტაბურობიდან გამომდინარე, დადასტურება აღნიშნულის შეუძლებელია, ჩვენ უნდა დაველოდოთ გამოძიებას,“ - აცხადებს მარიამ ჯაში.