იყო თუ არა უსაფრთხოების ნორმები დაცული სასტუმრო "ლეო გრანდში"

პოლიტიკა - 12:18, 25 Nov, 2017

1690

სასტუმრო "ლეოგრანდში" უსაფრთხოების წესების დაცვასთან დაკავშირებით ურთიერთგამომრიცხავი ინფორმაცია ვრცელდება. ტერიტორიაზე საგამოძიებო მოქმედებები ამ დრომდე გრძელდება. ადგილზე ექსპერტ-კრიმინალისტები მუშაობენ.

შს მინისტრმა ღამით გააკეთა განცხადება, რომ სასტუმროს სახანძრო კიბე არ ჰქონდა.

სამაშველო სამსახურის დირექტორი, ნიკოლოზ სირაძე მინისტრის განცხადებას არ ეთანხმება და აღნიშნავს, რომ სახანძრო კიბე აქვს სასტუმროს, მაგრამ მაშველებმა მისი გამოყენება ძლიერი დაკვამლიანების გამო ვერ შეძლეს.

აჭარის საგანგებო და გადაუდებელი სიტუაციების მართვის სააგენტოს უფროსის მოადგილე, მამუკა თურმანიძე სახანძრო კიბის არარსებობასთან დაკავშირებულ კითხვას დაზუსტებით არ პასუხობს და აღნიშნავს, რომ ელოდება საგამოძიებო მოქმედებების დასრულებას.

სასტუმრო „ლეოგრანდი“ აჭარის ტურიზმის დეპარტამენტმა ხანძარსაწინააღმდეგო სისტემის გაუმართაობის გამო რამდენიმე თვის წინ დააჯარიმა.

აჭარის ტურიზმის დეპარტამენტში ამ ეტაპზე კომენტარის გაკეთებისგან თავი შეიკავეს.

უსაფრთხოების ნორმებთან დაკავშირებით სასტუმროს მენეჯმენტიკი მედიასთან კომენტარს არ აკეთებს. ასევე, არ აცხადებენ, რა გახდა, სავარაუდოდ, ხანძრის გამომწვევი მიზეზი.