ბათუმში, სასტუმრო "ლეო გრანდში" ხანძარი ლიკვიდირებულია

შემთხვევა - 02:27, 25 Nov, 2017

1448

აჭარის სამაშველო სამსახურის ინფორმაციით, ბათუმში, სასტუმრო "ლეო გრანდში" ხანძარი ლიკვიდირებულია

„ხანძრის ქრობას ძლიერი დაკვამლიანება ართულებდა. მიუხედავად ამისა, მეხანძრე მაშველებმა და პოლიციის ყველა დანაყოფმა შევძელით უმოკლეს ხანში ხანძრის ჯერ ლოკალიზება და შემდეგ ლიკვიდაცია. სამი მეხანძრე-მაშველი მოთავსებულია კლინიკაში, ამ დროისათვის ისინი თავს კარგად გრძნობენ“, - განაცხადა აჭარის ავტონომიური რესპუბლიკის საგანგებო სიტუაციების მართვის მთავარი სამმართველოს უფროსის მოადგილემ მამუკა თურმანიძემ.

ხანძარს ბათუმში 120 მეხანძრე აქრობდა. შემთხვევის შედეგად, ამ წუთის მონაცემებით, გარდაცვლილია 11 ადამიანი, დაშავებული 10-ზე მეტი, მათ შორის სამი მეხანძრეა. დაშავებულები კლინკაში არიან გადაყვანილი.

მაშველებმა და პოლიციელებმა სასტუმროს შენობიდან ასზე მეტი ადამიანის ევაკუაცია მოახდინეს. მათ შორის არიან როგორც სტუმრები, ასევე, სასტუმროს თანამშრომლები. სხვადასხვა სირთულის ინტოქსიკაციის გამო, სასტუმროში მყოფი ადამიანები გადაყვანილი არიან ბათუმის კლინიკებში. მომხდარ ფაქტთან დაკავშირებით, გამოძიება საქართველოს სსკ-ს 243-ე მუხლის მე-3 ნაწილით მიმდინარეობს.