რატომ აცხადებდა ჩატაევს ნანუაშვილი უდანაშაულოდ - რა კომენტარს აკეთებს ომბუდსმენი 5 წლის შემდეგ

პოლიტიკა - 12:39, 24 Nov, 2017

3918

გავრცელებულ ვარაუდს იმის შესახებ, რომ გაბრიელ სალოსის ქუჩაზე ჩატარებული ანტიტერორისტული ოპერაციისას ტერორისტთა სიაში შესული აჰმედ ჩატაევის ლიკვიდაცია მოხდა, საქართველოს სახალხო დამცველი გამოეხმაურა. უჩა ნანუაშვილისთქმით მას ამ ინციდენტში მონაწილე პირების შესახებ ინფორმაცია არ აქვს. ჟურნალისტების კითხვაზე, გრძნობს თუ არა პასუხისმგებლობას იმასთან დაკავშირებით რომ 2012 წელს დაკავებული აჰმედ ჩატაევის ინტერესებს "ადამიანის უფლებათა ცენტრი" იცავდა, რომლის აღმასრულებელი დირექტორიც, ამჟამინდელი სახალხო დამცველი უჩა ნანუაშვილი აცხადებდა, რომ ახმედ ჩატაევი უდანაშაულოა. ნანუაშვილმა განაცხადა, რომ იმ კონკრეტულ საქმეზე ჩატაევს დანაშაული ვერ დაუმტკიცდა და სასამართლომ შესაბამისი გადაწყვეტილება მიიღო:

„სასამართლომ გაათავისუფლა იმის გამო, რომ ვერ დადგინდა კონკრეტული დანაშალის ნიშნები იმ საქმეში, რისთვისაც ის იყო დაკავებული. ეს იყო ის რეალობა და მოცემულობა რაც იმ დროისთვის იყო. დროს ნუ ვურევთ, ის იყო სხვა დროს, კონკრეტულ საქმეზე დაკავებული, იყო ასევე საქმეში მესაზღვრეების ჩვენება, რომლებიც ამბობდნენ რომ ჩატაევის წინააღმდეგ ძალით მიაცემინეს ჩვენება. სასამართლოს მიერ გამოტანილი განაჩენის შემდეგ რამდენიმე წელში ის გახდა ისლამური სახელმწიფოს მებრძოლი და შევიდა ტერორისტთა სიაში. ის იყო მოწვეული ხელისუფლების წარმომადგენლების მიერ როგორც შუამავალი იმ ინციდენტთან დაკავშირებით, რომელიც ლოპოტაში განვითარდა, მას ჰქონდა ლტოლვილის სტატუსი, რომელიც იყო გაცემული ავსტრიის ხელისუფლების მიერ და სარგებლობდა იმ დაცვით, რომელიც მან რამდენჯერმე გამოიყენა, მათ შორის ადამიანის უფლებათა ევროპული სასამართლოს მიერ მოხდა მისი დაცვა და ექსტრადიციის მოთხოვნა რამდენჯერმე არ დაკმაყოფილდა.“- განაცხადა უჩა ნანუაშვილმა.