რატომ არ ასახელებენ სპეცოპერაციისას ლიკვიდირებულთა ვინაობას?

რატომ არ ასახელებენ სპეცოპერაციისას ლიკვიდირებულთა ვინაობას? - "ეს ხელისუფლებას ცუდად შემოუბრუნდება"

პოლიტიკა - 15:01, 23 Nov, 2017

11987

თბილისში, უსაფრთხოების სახელმწიფო სამსახურის მიერ ჩატარებულმა ანტიტერორისტულმა ოპერაციამ ბევრი კითხვა გააჩინა.

22 საათიანი სპეცოპერაციის დროს, სხვადასხვა ვერსია გავრცელდა. ერთ-ერთის მიხედვით, ბინაში მნიშვნელოვანი ფიგურა იმყოფებოდა, რომლის ცოცხლად აყვანის ბრძანება იყო გაცემული. ითქვა ისიც, რომ ეჭვმიტანილებს მძევლები ყავდათ აყვანილი. (ინფორმაციას სუსი უარყოფს). დაუდასტურებელი ინფორმაციით, ჩატარებული სპეცოპერაციისას ლიკვიდირებულთა შორის აჰმედ ჩატაევია.

ვიდრე საზოგადოებაში არსებულ კითხვებზე ძალოვანი უწყებების მხრიდან პასუხები არ ჩანს, კიდევ უამრავი მოსაზრება გაჩნდება, ამიტომ ექსპერტები ხელისუფლებას ურჩევენ, ლიკვიდირებული ეჭვმიტანილებისა და დაკავებული პირის ვინაობა გაასაჯაროვონ.

პოლიტოლოგი გია ხუხაშვილის შეფასებით, მაშინ, როცა სუსი ამბობს, რომ დანაშულის შესახებ ინფორმაციას ფლობდა ბრალდებულთა იდენტიფიცირება უწყებას არ გაუჭირდებოდა.

"რა თქმა უნდა უნდა ვიცოდეთ მათი ვინაობა, უნდა ვიცოდეთ რასთან გვქონდა საქმე, რა და სად იგეგმებოდა. შეიძლება ჩვენ დეტალები არ ვიცოდეთ, მაგრამ მათი ვინაობა და გეგმები ცნობილი უნდა იყოს. ეს საერთაშორისო სტანდარტია. ასე რომ ორი აზრი არ არის, რომ ჩვენ ეს დეტალები უნდა ვიცოდეთ. შეგვიძლია სამართალდამცავთა სტრუქტურას გონივრული დრო მივცეთ, რომ უტყუარი ინფორმაცია მოგვაწოდოს, მაგრამ როგორც თვითონ ამბობენ, რომ ოპერატიული ინფორმაცია არსებობდა, ამ ადამიანების იდენთიფიცირება რთული არ უნდა იყოს. სხვა შემთხვევაში, შეიძლება ათასგვარი შეთქმულების თეორია განვითარდეს და ეს, ისევ და ისევ, ხელისუფლებას შემობრუნდება ცუდად"- აღნიშნა ხიხაშვილმა.

თბილისში, გაბრიელ სალოსის ქუჩაზე სპეცოპერაცია 21 ნოემბერს, 20:00 საათზე დაიწყო და 22 ნოემბერს 17:30 საათზე დასრულდა. სპეცოპერაციის დროს ადგილი ჰქონდა ინტენსიურ სროლასა და აფეთქებებს.

ოფიციალური ინფორმაციით, დაიღუპა 1 სპეცრაზმელი და 3 ბრალდებული.