"ბინა არ უნდა გაქირავებულიყო... ტერორისტებთან კავშირს გამოვრიცხავ"- ვის ეკუთვნის ბინა, სადაც ბრალდებულები გამაგრდნენ

პოლიტიკა - 20:45, 22 Nov, 2017

5893

როგორც „ნიუპოსტმა“ გაარკვია, ბერი გაბრიელ სალოსის ქუჩაზე მდებარე N46–ე კორპუსის მეორე სართულზე არსებული ბინა, რომელშიც ტერორიზმში ეჭვმიტანილები იყვნენ გამაგრებულები, პანკისის ხეობაში მცხოვრებ ასლან ჯაბრაილოვს ეკუთვნის.

ჩვენ ბინის ერთ-ერთი მესაკუთრის დას ვესაუბრეთ, რომელიც ტერორიზმში ეჭვმიტანილებზე ბინის მიქირავებას კატეგორიულად უარყოფს.

მისი თქმით, ბინა არ უნდა გაქირავებულიყო, რადგან მისი და საზღვარგარეთიდან დაბრუნებას და თბილისში აღნიშნულ ბინაში აპირებდა ცხოვრებას.

ბინის ერთ-ერთი მეპატრონის და ადასტურებს, რომ ბინაში „38 წლის რიზვან გორნაკაშვილი შედიოდა“, რომელიც სუს-მა უკვე დააკავა. დაკავებული სახლის მფლობელის ასლან ჯაბრაილოვის ცოლისძმაა.

„ბინა გაქირავებული არ უნდა ყოფილიყო, ჩემი დისგან ვიცი ეს ინფორმაცია. ჩემს დას უნდა ეცხოვრა იქ, როცა საზღვარგარეთიდან დაბრნდებოდა. რიზვანი ამ ბინაში შედიოდა. ტერორისტებთან კავშირს კატეგორიულად გამოვრიცხავთ“- აცხადებს ბინის ერთ-ერთი მეპატრონის და, რომელიც პანკისის ხეობაში ცხოვრობს.

რიზვან გორნაკაშვილის დაკავებას პანკისის უხუცესთა კავშირის თავმჯდომარე გამოეხმაურა. წუწაშვილი გორნაკაშვილის ტერორიზმთან კავშირს კატეგორიულად გამორიცხავს.

"არის დადებითი პიროვნება. წარმოუდგენელია მისი ტერორიზმთან რაიმე კავშირი"- აცხადებს უხუცესთა კავშირის თავმჯდომარე.

არსებული ინფორმაციით, ასლან ჯაბრაილოვის ბინა, მისი ცოლისძმის რიზვან გორნაკაშვილის შუამდგომლობით გაქირავდა. რაც შეეხება რიზვან გორნაკაშვილს, ის სამართალდამცავებმა უკვე დააკავეს.

თბილისში, ბერი გაბრიელ სალოსის ქუჩაზე კონტრტერორისტული სპეცოპერაცია ამ დროისთვის უკვე დასრულებულია.

სპეცოპერაციის დროს, სამართალდამცველებსა და ტერორიზმში ეჭვმიტანილებს შორის შეტაკება რამდენჯერმე მოხდა. ერთ-ერთი ასეთი სროლის დროს კი სპეცრაზმელი დაიჭრა, რომელიც საავადმყოფოში რამდენიმე ოპერაციის შემდეგ გარდაიცვალა.

სახელმწიფო უსაფრთხოების სამსახურის ოფიციალური ინფპორმაციით, სპეცოპერაციის შედეგად, დაკავებულია ერთი და ლიკვიდირებულია 3 პირი.