უკრაინის გენერალური პროკურორი უკრაინიდან ქართველების დეპორტაციის საკითხს გამოეხმაურა

პოლიტიკა - 09:42, 21 Nov, 2017

3401

უკრაინიდან საქართველოს მოქალაქეების გამოძევების საკითხს ქვეყნის გენერალური პროკურორი გამოეხმაურა. იური ლუცენკოს თქმით, უკრაინის ხელისუფლება არ აპირებს უცხოეთის, განსაკუთრებით კი, მოძმე საქართველოს იმ მოქალაქეების ქვეყნიდან დეპორტაციას, რომლებსაც დოკუმენტები წესრიგში აქვთ.

ლუცენკოს განცხადებით დეპორტაციის შესახებ გადაწყვეტილების მიღების უფლებამოსილება მხოლოდ საემიგრაციო სამსახურს აქვს, გენერალური პროკურორის თქმით, თუ საემიგრაციო სამსახურის გადაწყვეტილების სამართლიანობასთან დაკავშირებით რაიმე პრეტენზია არსებობს, დეპორტირებულებმა სასამართლოს უნდა მიმართონ. ლუცენკოს თქმით, თუ მსგავსი გადაწყვეტილება უსამართლოდ იყო მიღებული, პროკურატურა მზადაა გამოძიება ჩაატაროს და დანაშაულის დამტკიცების შემთხვევაში, მოხელეები პასუხისგებაშიც მისცეს:

"უცხოეთის ნებისმიერ მოქალაქეს, განსაკუთრებით კი, მოძმე საქართველოს მოქალაქეებს, ვისაც უკრაინის ტერიტორიაზე დროებით ბინადრობის ან მუშაობისთვის საჭირო დოკუმენტაცია წესრიგში აქვს, შეუძლიათ აქ თავისუფლად იცხოვრონ და იმუშაონ. რაც შეეხება მიხეილ აბზიანიძეს, საემიგრაციო სამსახურის ინფორმაციით, რომლის უფლებამოსილება მსგავსი საკითხების შესწავლაა, მას არ ჰქონია მუდმივად ცხოვრების ნებართვა. მხოლოდ საემიგრაციო სამსახურს, პროკურატურის ჩარევის გარეშე აქვს უფლება, მიიღოს გადაწყვეტილება პირის გაფრთხილებისა და შემდგომი დეპორტაციის შესახებ. თუ ეს სიმართლეს არ შეესაბამება, მის ადვოკატებს შეუძლიათ მოგვმართონ და მათი პოზიციის დამტკიცების შემთხვევაში, პასუხისმგებელი მოხელეები დაისჯებიან." - განაცხადა ლუცენკომ.