ეს უკრაინისა და საქართველოს უშიშროების ერთობლივი ოპერაციაა - სააკაშვილი უკრაინიდან ქართველების დეპორტაციაზე (ვიდეო)

პოლიტიკა - 21:23, 19 Nov, 2017

3104

საქართველოს მესამე პრეზიდენტი, უკრაინული პარტია "ახალ ძალთა მოძრაობის" ლიდერი მიხეილ სააკაშვილი აცხადებს, რომ უკრაინიდან ქართველების დეპორტირება და საქართველოს ზოგიერთი მოქალაქის უკრაინაში არ შეშვება არის საქართველოსა და უკრაინის სპეცსამსახურების ერთობლივი ოპერაცია.

"მე მაკვირვებს, მიამიტური განცხადება, რომ საგარეო საქმეთა სამინისტრო რატომ არ იცავს ქართველებს, თქვენ აღარ გყავთ საგარეო სამინისტრო, აღარ გყავთ მთავრობა და სახელმწიფო აპარატი, დაივიწყეთ, საქართველოს აღარ ყავს პატრონი და აღარ ყავს სახელმწიფო აპარატი. მეტსაც გეტყვით, ეს ყველა გვარი კიევში გადაცემულია თბილისიდან. ეს გვარები გადაცემულია სუსიდან, დანამდვილებით ვიცი, აი ლოგიკას მიყევით, ისეთი ხალხი ჩამოსვეს თვითმფრინავიდან კიევში, რომ უკრაინაში ვერაფრით ეცოდინებოდათ რომ იყვნენ ჩემთან კონტაქტში. ეს ინფორმაცია აქვს საქართველოს, უკრაინის სპეცსამსახურებს ეს ინფორმაცია არ აქვს. ჩავიდა პოროშენკო საქართველოში მოელაპარაკა ივანიშვილს ჩემს წინააღმდეგ მოქმედებებზე, მოელაპარაკა იმიტომ რომ ეშინია, ეშინიათ ჩემი, რომ მათთვის ვარ რეალური საფრთხე. ეშინიათ რომ მე და ჩემი გუნდი არ მოვიდეთ უკრაინის ხელისუფლებაშ," - აცხადებს მიხეილ სააკაშვილი.

იგი ასევე აცხადებს, რომ სწორედ ამ მოლაპარაკებების შემდეგ ჩამოართვეს მას უკრაინის მოქალაქეობა და ახლა ცდილობენ გარემოცვა ჩამოაშორონ, რაზეც ისიც მეტყველებს, რომ უკრაინაში არ შეუშვეს მასტან ადრე კონტაქტზე მყოფი ხალხი, მათ შორის ისინიც, ვინც მიხეილ სააკაშვილს 7-8 წელია არ უნახია.

მიხეილ სააკაშვილის განცხადებით, ის გაჩერებას არ აპირებს და დროა, ორივე ქვეყნის მოქალაქეებმა იფიქრონ არა კონკრეტულ გვარებზე და სახელებზე, არამედ იმაზე, რომ ის, რაც მათ თავს ხდება, ეს ყველას ეხება.

„როგორც ორი ქვეყნის ოლიგარქები მოქმედებენ ერთად, ასე ორი ქვეყნის მოქალაქეებმა უნდა იმოქმედონ ერთად,“ - განაცხადა სააკაშვილმა.

მისივე თქმით, საქართველოს მოქალაქეები უკრაინაში ისჯებიან მის გამო, რისთვისაც ის ბოდიშს იხდის.