ჯერჯერობით უცნობია საქართველოს 9 მოქალაქის, მათ შორის რუსთავი2-ის კიევის ბიუროს ოპერატორისა და რუსეთ-უკრაინის ომში უკრაინის მხარეს მებრძოლი ქართველი სამხედროების ადგილსამყოფელი.

უკრაინის ხელისულფებამ ისინი გუშინ დააკავა, თუმცა ამ დრომდე საქართველოს მოქალაქეები სამშობლოში არ ჩამოსულან.

ოფიციალური ინფორმაციით, მათ ქვეყანა უკვე დაატოვებინეს. უკრაინიდან საქართველოში, თბილისის საერთაშორისო აეროპორტში, უახლოესი რეისი, დაახლოებით, ერთ საათში უნდა შესრულდეს. უცნობია, მგზავრებს შორის იქნებიან თუ არა ქართველი დეპორტირებულები.

ასევე, უკრაინულ მედიაში ვრცელდება ინფორმაცია, რომ თვითმფრინავში შესაძლოა არ იყოს ოთხი ქართველი დაკავებული - "რუსთავი 2"-ის ჟურნალისტი და სამი ქართველი მებრძოლი, რადგან ისინი თვითმფრინავის ბორტზე არავის უნახავს.

როგორც მიხეილ სააკაშვილი თავის ფეისბუქ გვერდზე წერს, შესაძლოა თამაზ შავშიშვილი და სამი ქართველი მებრძოლი ოდესიდან ფოთში ბორნით გადაიყვანეს.

"ჩვენი წყაროები ოდესაში იტყობინებიან, რომ დაკავებული ჟურნალისტი და ანტიტერორისტული ოპერაციის ქართველი მებრძოლები ბორან "ვილნიუსით" ჩერნომორსკიდან ფოთის მიმართულებით მიემგზავრებიან, სადაც ისინი პირადად გენერალმა კოსიკმა ჩაიყვანა. ვაგრძლებ ინფორმაციის გადამოწმებას," - წერს მიხეილ სააკაშვილი.