"არის კარგი თამადა“ - კალაძე ,,სულიკო კედელაშვილთან“ დაკავშირებით გადაწყვეტილებას არ ცვლის და მერიის უსაფრთხოებას აბარებს

პოლიტიკა - 12:30, 16 Nov, 2017

4160

თბილისის მერიის უსაფრთხოების სამსახურის უფროსის პოსტზე ნუგზარ ჭონქაძის, იგივე სულიკო კედელაშვილის შესაძლო დანიშვნასთან დაკავშირებით, ოპოზიციის მხრიდან წამოსულ კრიტიკას კახა კალაძემ უპასუხა. მისი თქმით მას კედელაშვილის წარსულთან კითხვები არ აქვს და დარწმუნებულია, რომ ის დაკისრებულ მოვალეობას თავს წარმატებით გაართმევს. როგორც კალაძემ ჟურნალიტებთან აღნიშნა, ნუგზარ ჭონქაძე, წლების განმავლობაში მისი ბანკის უსაფრთხოების სამსახურის ხელმძღვანელიც იყო:

„ნუგზარ ჭონქაძეს მინდა წარმატებები ვუსურვო, უსაფრთხოების სამსახური ძალიან მნიშვნელოვანი სამსახურია და დარწმუნებული ვარ რომ ის თავს გაართმევს.“- განაცხადა კალაძემ.

ჟურნალისტის კითხვას გეგმავს თუ არა გადაწყვეტილების გადახედვას კალაძემ კითხვითვე უპასუხა:

„რატომ? რა დააშავა ამ ადამიანმა? რა წარსული აქვს ამ ადამიანს? წლების განმავლობაში მუშაობდა სახელმწიფო უსაფრთხოების სამსახურში, საფინანსო სამსახურში, წლების განმავლობაში იყო პროგრეს ბანკის უსაფრთხოების ხელმძღვანელი, რომელ წარსულზე მელაპარაკებით? არის ჩოხოსანი, არის კარგი თამადა.“- განაცხადა კალაძემ.

კალაძემ "ერთიანი ნაციონალური მოძრაობის" კრიტიკასაც უპასუხა და მათ ენმ-ს მმართველობის დრო შეახსენა.

“საინტერესოა, ჩვენ ვისმენთ ბრალდებებს და შენიშვნებს იმ ადამიანებისგან, რომლებსაც სისხლში აქვთ ხელი ამოსვრილი, წლების განმავლობაში ეს ადამიანები აუპატიურებდნენ ცოცხებით, ვარდებით დაიწყეს და ცოცხებით დაამთავრეს. მე არ მიყვარს გასულ წლებზე საუბარი, ხალხი ელოდება მომავლში განვითარებას იმას, რომ მნიშვნელოვანი პროექტები განხორციელდება, თუმცა მიწევს შეხსენება, იმ ცხრაწლიან პერიოდზე, როდესაც მიხეილ სააკაშვილი ბობოქრობდა ჩვენს ქვეყანაში უხერხულია ეს ადამიანები ჰომოფობიურ განცხადებებზე იძლეოდნენ შენიშვნებს.” – განაცხადა კახა კალაძემ.