რუსთავის მერი ირაკლი ტაბაღუა "სოკარ ჯორჯია გაზი"-ს წარმომადგენლებს შეხვდა

პოლიტიკა - 11:22, 15 Nov, 2017

959

რუსთავის მერი ირაკლი ტაბაღუა ,,სოკარ ჯორჯია გაზის“ აღმოსავლეთ რეგიონის დირექტორ მიხეილ სამხარაულსა და კომპანიის სხვა წარმომადგენლებს შეხვდა. შეხვედრას ა(ა)იპ ,,რუსთავის კორპუსის’’ და ქალაქის ადმინისტრაციულ ერთეულებში მერის წარმომადგენლები, ასევე, ბინათმესაკუთრეთა ამხანაგობის თავმჯდომარეები ესწრებოდნენ. მხარეებმა ბუნებრივ აირზე მომუშავე გამათბობლების უსაფრთხოებასა და ზამთრის სეზონის დადგომამდე, პრევენციული ღონისძიებების გატარებაზე ისაუბრეს.

2016-2017 წლის შემოდგომა-ზამთრის პერიოდში, რუსთავში ნახშირჟანგით ინტოქსიკაციის საგანგაშო სტატისტიკა დაფიქსირდა. 2017 წლის 1-ლი თებერვლიდან 5 მარტის ჩათვლით, მხუთავი აირით მოწამვლის 120 შემთხვევა იყო რეგისტირებული. ეს მაჩვენებელი, წინა წელთან შედარებით, საგრძნობლად იყო გაზრდილი, რადგან, 2016 წლის ანალოგიურ პერიოდში, (1ლი თებერვალი-5 მარტი) ინტოქსიკაციის 52 შემთხვევა იყო დაფიქსირებული. 2016 წლის შემოდგომიდან, 2017 წლის მარტის ბოლომდე, ნახშირჟანგით ინტოქსიკაციის შედეგად, რუსთავში 11 ადამიანი გარდაიცვალა. საგანგაშო სტატისტიკიდან გამომდინარე, რუსთავის მერიისა და ,,სოკარ ჯორჯია გაზის“ წარმომადგენლებმა ერთობლივი საინფორმაციო კამპანია აწარმოეს და საცხოვრებელ კორპუსებში, უსაფრთხოების ნორმების დარღვევით დამონტაჟებული წყლის გამათბობლების შემოწმებაც დაიწყეს. შემოწმებული 7582 გამათბობლიდან, 4 683 არასწორად, კუსტარულად იყო დამონტაჟებული. მიმდინარე წლის ოქტომბერ-ნოემბერში, რუსთავში უკვე დაფიქსირდა ნახშირჟანგით ინტოქსიკაციის რამდენიმე შემთხვევა, თუმცა, ლეტალური შედეგით არცერთი მათგანი არ დასრულებულა.