რუსული "კაგებე"-ს ანალოგი - ოპოზიცია საგარეო დაზვერვის უსაფრთხოების სამსახურთან გაერთიანებას აკრიტიკებს

პოლიტიკა - 18:08, 14 Nov, 2017

1964

მთავრობის გადაწყვეტილებით, საგარეო დაზვერვა უსაფრთხოების სამსახურთან უნდა გაერთიანდეს - ფაქტს ოპოზიციაში აპროტესტებენ.

უსაფრთხოების და საგარეო დაზვერვის სამსახურების ნაცვლად ქვეყანა მიიღებს რუსული "კაგებე"-ს ანალოგს - ეს მოსაზრება "ნაციონალურ მოძზარობას" ეკუთვნის.

„ერთადერთი მსგავსი სტრუქტურა, რომელიც მახსენდება, ანუ როდესაც შიდა დაზვერვა და საგარეო დაზვერვა არის ერთ ქუდს ქვეშ, ანუ გაერთიანებული ეს იყო უსაფრთხოების კომიტეტი, ანუ ე. წ. "კაგებე". მსგავსი პრეცედენტი არ არსებობს დაზვერვის ინსტიტუტებში, როდესაც ორი ერთმანეთის დამბალანსებელი ინსტიტუტი გაერთიანებულია ერთი სტრუქტურის ქვეშ,“ - განაცხადა „ნაციონალური მოძრაობის“ წევრმა ხატია დეკანოიძემ.

ენმ-ს შეფასებით, სუს-ის ისედაც ძლიერი გავლენები კიდევ უფრო იზრდება და ახალი უწყება ქვეყნის საგარეო უსაფრთხოების ნაცვლად, პოლიტიკური ოპონენტების საქმიანობას გააკონტროლებს.

„თავისუფალ დემოკრატების“ თავმჯდომარე თამარ კეკენაძე აცხადებს, რომ პრემიერმინისტრმა ამ გადაწყვეტილებებით მოშალა უსაფრთხოების და თავდაცვის სისტემა.

„ამის მიღმა ნამდვილად არ დგას იმის სურვილი, რომ ეს სფერო უფრო ეფექტური გახდეს და კარგად დაიცვას ქვეყნის გამოწვევები და ის რეალობა, რაშიც დღეს ჩვენ ვიმყოფებით. ეს იყო ძალიან მარტივი გადაწყვეტილება. ამ გადაწყვეტილებით მათ მოიშორეს ღარიბაშვილის კადრები,“ - განაცხადა თამარ კეკენაძემ.