არჩევნების მეორე ტური ჯერჯერობით მშვიდად მიმდინარეობს

პოლიტიკა - 11:00, 12 Nov, 2017

834

მერების არჩევნების მეორე ტური ჯერჯერობით მშვიდად მიმდინარეობს.

ქუთაისსა და მარტვილში სახელისუფლებო კანდიდატები უკონკურენტოდ დარჩნენ "ნაციონალური მოძრაობის" მიერ მეორე ტურისთვის გამოცხადებულკი ბოიკოტის გამო. საარჩევნო უბნებზე არ იმყოფებიან „ნაციონალური მოძრაობის“ კომისიის წევრები. ბოიკოტის გამო პარტიამ წარმომადგენელი გაიწვია.

ერთ-ერთი ყველაზე დაძაბული საარჩევნო პროცესი დღეს გურიაში იქნება. ოზურგეთში მეორე ტური „ქართული ოცნების“ მერობის კანდიდატ ბეგლარ სიორიძესა და დამოუკიდებელ კანდიდატ კონსტანტინე შარაშენიძეს შორის იმართება. პირველი ტურშ მათ შორის სხვაობა დაახლოებით ერთი პროცენტი იყო.

ამ ეტაპზე საარჩევნო უბნებზე სიმშვიდეა. როგორც ამომრჩეველი ასევე საარჩევნო უბნის წარმომადგენლები აცხადებენ, რომ საარჩევნო პროცესი ხარვეზების გარეშე მიმდინარეობს.

ხაშურის საარჩევნო ოლქში ყველა საარჩევნო უბანი გახსნილია. არჩევნების მეორე ტურში ერთმანეთს „ქართული ოცნების“ მერობის კანდიდატი, გიორგი გურასპაშვილი და დამოუკიდებელი კანდიდატი, რამაზ ნოზაძე უპირისპირდებიან.

დამოუკიდებელი კანდიდატი რამაზ ნოზაძე აცხადებს, რომ ამომრჩევლკის საარჩევნო უბანზე მიყვანისთვის, სავარაუდოდ, "ოცნება" სახელისუფლებო რესურსს გამოიყენებს.

ბორჯომში, თვითმმართველობის არჩევნების მეორე ტური იმართება. მერობისთვის „ქართული ოცნების“ კანდიდატი ლევან ლიპარტია და „პატრიოტთა ალიანსის“ კანდიდატი ზაზა ჩაჩანიძე იბრძვიან.

ბორჯომში სულ 30 საარჩევნო უბანია გახსნილი, სადაც საარჩევნო პროცესი დაახლოებით 2 საათია რაც დაიწყო. სულ ბორჯომში 26 ათას 529 ამომრჩეველია.

როგორც საოლქო საარჩევნო კომისიაში ამბობენ, ამ დროისთვის არც ერთი საჩივარი არ შესულა.