დღეს საქართველოში ადგილობრივი თვითმმართველობის არჩევნების მეორე ტურია - თვითმმართველ ქალაქ ქუთაისსა და 5 თვითმმართველ თემში მარტვილში, ბორჯომში, ოზურგეთში, ხაშურსა და ყაზბეგში მერს ირჩევენ. არჩევნებში 6 საარჩევნო სუბიექტი მონაწილეობს, რომელთაგანაც 2 საინიციატივო ჯგუფის მიერ წარდგენილი კანდიდატია.

საარჩევნო პროცესი 300-ზე მეტ უბანზე 8 საათზე გაიხსნა.

„12 ნოემბრის არჩევნებში, სხვადასხვა საარჩევნო ოლქებში მონაწილეობას იღებს 6 საარჩევნო სუბიექტი, მათგან 2 არის წარდგენილი საინიციატივო ჯგუფის მიერ. დღეს ამომრჩევლებს საარჩევნო უბანში მხოლოდ ერთი საარჩევნო ბიულეტენი დახვდებათ - მერის არჩევნებისათვის. საჭიროებისას, ამომრჩევლებს შესაძლებლობა ექნებათ ისარგებლონ გამადიდებელი ლინზით, ბიულეტენის შესავსები ჩარჩო-ფორმითა და ხმის მიცემის პროცედურების ამსახველი პოსტერით. ასევე, ადაპტირებული საარჩევნო უბნები აღჭურვილია სპეციალური ხმის მიცემის კაბინებით. 12 ნოემბრის არჩევნებზე მონაწილე საარჩევნო სუბიექტების მიერ რეგისტრირებული დაკვირვების უფლების მქონე 2 ათას 143 წარმომადგენელია, ასევე დაკვირვების უფლების მქონე ადგილობრივი არასამთავრობო ორგანიზაციების 18 ათას 149 და საერთაშორისო სადამკვირვებლო ორგანიზაციების 654 დამკვირვებელი. რაც შეეხება მედიაორგანიზაციებს, 4 ათას 688 წარმომადგენელი,“ - განმარტა საქართველოს ცენტრალური საარჩევნო კომისიის სპიკერმა, ანა მიქელაძემ.

ქუთაისსა და მარტვილში "ნაციონალურმა მოძრაობამ" მეორე ტურში მონაწილეობაზე უარი თქვა. თუმცა, საარჩევნო კანონმდებლობის თანახმად, მეორე ადგილზე გასული პარტიის კანდიდატები საარჩევნო ბიულეტენებში მაინც ფიქსირდებიან.