2017 წლის 10 ნოემბერს ევროკომისიამ საქართველოს მიერ ასოცირების შეთანხმების შესრულების თაობაზე ანგარიში გამოაქვეყნა, რომელიც მოიცავს პერიოდს 2016 წლის დეკემბრიდან 2017 წლის ბოლომდე. დოკუმენტში შეფასებულია საქართველოს მიერ ასოცირების შესახებ შეთანხმების ფარგლებში რეფორმების განხორციელების კუთხით მიღწეული პროგრესი. ანგარიშის თანახმად 2017 წელს საქართველოსა და ევროკავშირს შორის ურთიერთობები კიდევ უფრო ინტენსიური გახდა.

ევროკომისიის ანგარიშში მოხვდა ტელეკომპანია „რუსთავი 2“-ის საქმე, სადაც აღნიშნულია, რომ ქვეყანაში მედიაგარემო პოლარიზებულია, სამართლებრივი ბრძოლები სატელევიზიო არხების საკუთრებასთან დაკავშირებით კი საფუძვლად უდევს პოლიტიკურ დავას მედიის პლურალიზმსა და სასამართლო სისტემაზე პოტენციური პოლიტიკური ზეწოლის შესახებ:

“2017 წლის მსოფლიოს პრესის თავისუფლების ინდექსის მიხედვით საქართველო 180 ქვეყნიდან 64-ე ადგილზე რჩებოდა. მიუხედავად იმისა, რომ მედიაგარემო პოლარიზებულია, იგი დინამიკური და პლურალისტურია. სამართლებრივი ბრძოლები სატელევიზიო არხების საკუთრებასთან დაკავშირებით კვლავ საფუძვლად უდევს პოლიტიკურ დავას მედიის პლურალიზმსა და სასამართლო სისტემაზე პოტენციური პოლიტიკური ზეწოლის შესახებ. სატელევიზიო არხი „რუსთავი-2“-ის საქმეს ამჟამად ადამიანის უფლებათა ევროპული სასამართლო განიხილავს“, - ნათქვამია ანგარიშში.