,,ტრამპის მაგივრად ბიძინა“... "ტრამპთაუერის" ნაცვლად ივანიშვილის „სილქ თაუერი“- ოპოზიცია ექსპრემირს მტაცებელს უწოდებს

პოლიტიკა - 20:54, 09 Nov, 2017

4355

ბათუმში "ტრამპთაუერის" პროექტი აღარ აშენდება, თუმცა იმავე ადგილას მშენებლობას ბათუმში „სილქ როუდ ჯგუფი“ ყოფილი პრემიერის, ბიძინა ივანიშვილის თანაინვესტირების ფონდთან ერთად გააგრძელებს.

როგორც ირკვევა, პროექტთან ამერიკის მოქმედ პრეზიდენტს აღარ ექნება შეხება.

თანაინვესტირების ფონდმა და „სილქ როუდმა“ სახელმწიფოსგან მიწის ნაკვეთების სიმბოლურ ფასად გადმოცემა უკვე მოითხოვეს.

„ნაციონალური მოძრაობის“ ბათუმის რაიონული ორგანიზაციის თავმჯდომარე გიორგი კირთაძე აცხადებს, რომ ბიძინა ივანიშვილი ნამდვილი მტაცებელი გახდა.

„ერთ დროს ყველასათვის ასეთ ქველმოქმედად ცნობილი ბიძინა ივანიშვილი, გახდა მთავარი მტაცებელი, მათ შორის აჭარაშიც. კარგად გვახსოვს ცათამბრჯენებთან მიმართებაში რა დამოკიდებულება ჰქონდა მაშინდელ ოპოზიციას და დღეს რომ ხელისუფლებაში არიან. "ტრამპთაუერი" უნდა გახსნილიყო ბათუმში და ალბათ, ამის მნიშვნელობა ყველას კარგად უნდა გვესმოდეს რა იყო, რა მიმზიდველს ხდიდა ეს ყველაფერი ამ ქალაქს. ახლა ბიძინა ივანიშვილისთვის არის თურმე მისაღები და ტრამპის მაგივრად ბიძინა იქნება მეწილე,“ - განაცხადა გიორგი კირთაძემ.

ბათუმში „ტრაპმთაუერის“ მშენებლობა 2012 წელს დონალდ ტრამპის საქართველოში ვიზიტისას დაიგეგმა. ტრამპის კომპანიამ საინვესტიციო პროექტი 2016 წელს შეწყვიტა.