ნინო გვენეტაძე პოსტზე დარჩა და მოსამართლეების უვადოდ დანიშვნას ხელი მოაწერა

პოლიტიკა - 19:49, 09 Nov, 2017

3276

იუსტიციის უმაღლესი საბჭოს თავმჯდომარე ნინო გვენეტაძე თანამდებობაზე რჩება. შეხვედრა უზენაეს სასამართლოში დასრულდა.

შეხვედრიდან გამოსვლის შემდეგ, ნაზი ჯანეზაშვილმა ჟურნალისტებთან საუბრისას განაცხადა, რომ ნინო გვენეტაძემ მოსამართლეების უვადოდ დანიშვნის გადაწყვეტილებას ხელი მოაწერა, შესაბამისი განცხადება კი მოგვიანებით გავრცელდება.

"დახურული სახის შეხვედრა უზენაესი სასამართლოს თავმჯდომარის ინიციატივით გაიმართა. საბჭოს წევრები იმ მოსამართლეებს შევხვდით, რომლებიც უვადოდ დანიშვნის პროცედურებში მონაწილეობას იღებდნენ. ჩვენ გვქონდა მსჯელობა უვადოდ დანიშვნებთან და ზოგადად ამ პროცედურებთან დაკავშირებით. დაზუსტებით შემიძლია გითხრათ რომ ქალბატონი ნინო გაავრცელებს ოფიციალურ განცხადებას, ყველა იმ საკითხთან დაკავშირებით, რომელზეც შეხვედრაზე ისაუბრა. ეს შეეხება ხელის მოწერას, უვადოდ დანიშვნას"- აღნიშნა ჯანეზაშვილმა.

შეხვედრიდან გამოსვლის შემდეგ, ჟურნალისტებთან ასევე კომენტარი კომენტარი გააკეთა იუსტიციის საბჭოს კიდევ ერთმა წევრმა, მერაბ გაბინაშვილმა. როგორც მან აღნიშნა ნინო 34 მოსამართლის უვადოდ გამწესების შესახებ გადაწყვეტილებას ხელი მოაწერა.

„ნინო გვენეტაძემ ხელი მოაწერა დოკუმენტს და მოგვილოცა"- განაცხადა აბინაშვილმა.

რაც შეეხება გვენეტაძის მიერ თანამდებობის შესაძლო გადადგომას, საბჭოს წევრები აღნიშნავენ, რომ საკადრო ცვლილებების შესახებ საუბარი არ ყოფილა.