ევროსაბჭოს ანგარიშს „კონფლიქტები საქართველოში“, რომელიც საქართველოს ოკუპირებულ ტერიტორიებზე არსებულ მდგომარეობას ეხება, ამერიკის შეერთებული შტატების ელჩი დადებითად აფასებს. იან კელის თქმით მისასალნებელია ნებისმიერი საკითხი, რაც კიდევ უფრო მეტ ყურადღებას მიაპყრობს აღნიშნულ პრობლემას და გაზრდის ცნობიერებას:

“მივესალმებით ევროსაბჭოს ანგარიშს ამერიკის შეერთებული შტატები ძალიან შეშფოთებულია იმ სიტუაციით რაც ხდება ოკუპირებულ ტერიტორიებზე, როგორიც არის მაგალითად გამშვები პუნქტების დახურვა, იმ პირების დაკავება ვინც ადმინისტრაციულ საზღვარს გადაკვეთს. ნებისმიერი საკითხი, რაც კიდევ უფრო მეტ ყურადღებას მიაპყრობს აღნიშნულ პრობლემას და გაზრდის ცნობიერებას, მისასალმებელია.“- განაცხადა იან კელიმ.

შეგახსენებთ, რომ 2017 წლის 8 ნოემბერს, ევროპის საბჭოს მინისტრთა მოადგილეების კომიტეტის 1299-ე სხდომაზე განხილულ იქნა გენერალური მდივნის ტორბიორნ იაგლანდის მე-16 კონსოლიდირებული ანგარიში - „კონფლიქტი საქართველოში“, რომელიც მოიცავს პერიოდს 2017 წლის აპრილიდან 2017 წლის სექტემბრის ჩათვლით.

მე-16 კონსოლიდირებულ ანგარიშში გენერალური მდივანი ყურადღებას ამახვილებს საქართველოს ოკუპირებულ ტერიტორიებზე უსაფრთხოების, ადამიანის უფლებებისა და ჰუმანიტარული კუთხით არსებულ რთულ ვითარებაზე. აგრეთვე ეთნიკური ქართველებისთვის უფლებების შეზღუდვაზე მშობლიურ ენაზე განათლების აკრძალვის შემდეგ აფხაზეთის რეგიონში შექმნილ მძიმე ვითარებაზე. ანგარიშში ხაზი გაესვა ისეთ საკითხებს, როგორიცაა სოფელ ერედვში ქართველთა კუთვნილი სახლების განადგურების ფაქტები, გამშვები პუნქტების დახურვა, ე.წ. ბორდერიზაცია, გადაადგილების თავისუფლების შეზღუდვა, ეთნიკური ნიშნით შევიწროვება და სხვა სახის პრობლემები.