"თურქეთსა და საქართველოს ბევრი მიღწევა აქვს" - ზექი ლევენთ გუმრუქჩუმ საქართველოში მუშაობა დაასრულა

პოლიტიკა - 11:43, 09 Nov, 2017

1006

თურქეთის ელჩმა საქართველოში 4 წლიანი მოღვაწეობა დაასრულა. საგარეო უწყების ხელმძღვანელმა მიხეილ ჯანელიძემ ზექი ლევენთ გუმრუქჩუსთან გამოსამშვიდობებელი შეხვედრა გუშინ გამართა. მინისტრმა ელჩს გაწეული სამსახურისთვის მადლობა გადაუხადა და ორ ქვეყანას შორის არსებულ მტკიცე ურთიერთობას გაუსვა ხაზი.

ზექი ლევენთ გუმრუქჩუს თქმით, საქართველოს ტერიტორიული მთლიანობის საკითხზე და ნატოს წევრობისკენ მიმავალ გზაზე, თურქეთი საქართველოს ერთ-ერთი ყველაზე მტკიცე მხარდამჭერია. ელჩის განცხადებით, ბოლო 4 წლის განმავლობაში თურქეთსა და საქართველოს ბევრი მიღწევაა:

„ბოლო 4 წლის განმავლობაში თურქეთსა და საქართველოს ბევრი მიღწევა გვაქვს. ჩვენ შევქმენით მაღალი დონის სტრატეგიული თანამშრომლობის საბჭო. კიდევ უფრო გამყარდა თურქეთის მხარდაჭერა საქართველოს ტერიტორიული მთლიანობისა და სუვერენიტეტის, ასევ ევროატლანტიკური მისწრაფებების მიმართ. ყველა საერთაშირისო პლატფორმაზე თურქული მხარე საუბრობს საქართველოს ტერიტორიული მთლიანობის საკითხზე და ნატოს წევრობისკენ მიმავალ გზაზე, თურქეთი საქართველოს ერთ-ერთი ყველაზე მტკიცე მხარდამჭერია. გარდა ამისა ჩვენ ვეხმარებით ქართულ მხარეს მოემზადოს ალიანსის მომავალი წევრობისთვის. ჩვენ ბევრს მივაღწიეთ, მაგრამ ჩვენს ქვეყნებს შორის თანამშრომლობის კუთხით, კიდევ უფრო დიდი პოტენციალი არსებობს,"-განაცხადა ზექი ლევენთ გუმრუქჩუმ.