საქართველოს პარლამენტის თავმჯდომარის მოსაზრებით პარტიების დაფინანსების საკითხი რეფორმირებას საჭიროებს, ირაკლი კობახიძემ სამწუხარო მოვლენა უწოდა იმ ფაქტს, რომ გადასახადების გადამხდელების ხარჯზე დაფინანსებას 20-მდე პარტია იღებს.

ფაქტს ოპოზიციის მხრიდან კრიტიკა უკვე მოჰყვა. "ევროპული საქართველოს" ერთ-ერთი ლიდერის ლევან თარხნიშვილის განცხადებით, მათთვის გაუგებერია, როგორ უნდა შეიცვალოს კანონი უკვე დამდგარი შედეგის ფონზე. ამასთან თარხნიშვილისთვის მიუღებელია, რომ ახალი კანონით ოპოზიციის ინტერესები დაზიანდეს.

"რატომ დადგა და რატომ დააყენა პარტიების დაფინანსების საკითხი, ახლა ეს პარლამენტის თავმჯდომარეს უნდა ვკითხოთ. რაც შეეხება თვითონ მის გადახედვას, აქ გასათვალისწინებელია რამოდენიმე ფაქტი - პირველი: არ შეიძლება უკვე დამდგარი რეზულტატების პოსტფაქტუმ გადახედვა ანუ ის, რომ კანონს ჰქონდეს უკუგების ძალა, მით უმეტეს მაშინ, როცა ეს ვიღაცის მდგომარეობას აუარესებს. მეორე ჩვენთვის მიუღებელი იქნება, დაფინანსების გადახედვის შედეგად რომელიმე პარტიის დაფინანსების გაუარესება და მესამე, ეს გადახედვა არ უნდა ითვალისწინებდეს ხელისუფლებასთან დაახლოებული პარტიების წახალისებას, რასაც აპირებენ "მრეწველების" შემთხვევაში"- განაცხადა "ნიუპოსტთან" ლევან თარხნიშვილმა.