კახა კალაძე გმირთა მოედანზე მიწისქვეშა გადასასვლელში - ,,შეუძლებელია, პირბადის გარეშე გაიარო“ (ფოტომასალა)

პოლიტიკა - 12:59, 07 Nov, 2017

13655

თბილისის ახლად არჩეული მერი დღეს გმირთა მოედანზე, ცირკის მიმდებარე ტერიტორიაზე არსებულ მიწისქვეშა გადასასვლელში იმყოფებოდა. კახა კალაძის თქმით მიწისქვეშა გადასასვლელებში არსებულილ მდგომარეობა ძალიან მძიმეა და კრიტიკას ვერ უძლებს:

“მიწისქვეშა გადასასვლელები დავათვალიერეთ და მართლაც კრიტიკას ვერ უძლებს, ძალიან მძიმე მდგომარეობაა. აქ არის რამდენიმე მიმართილება, პირველი რაც მინდა ვთხოვო “თბილსერვისის” ხელმღვანელს, დღესვე დაიწყოს სამუშაოების შესრულება, მორეცხვა, ელექტრო გაყვანილობა და განათება, აქ არაფერი არ არსებობს.სხვათაშორის იყო განათება, თუმცა მოგლეჯილი დაზიანებული და გაუბედურებულია. ყველაფერი, რაც შეიძლება მწყობრში უნდა მოვიყვანოთ და ადამიანებს უნდა ქონდეთ შესაძლებლობა, როდესაც ისარგებლებენ გადასასვლელით, ელემენტარული სისუფთავე იყოს და კომფორტულად შეეძლოთ გადაადგილება. ასევე მინდა, გთხოვოთ, მიწისქვეშა გადასასვლელები, რომელიც არის გასხვისებული და იჯარით გაცემული, ერთიანი სტანდარტი იქნეს შემუშავებული, სრული სურათი წარმოადგინოთ 10 დღის განმავლობაში. ყველა ადამიანმა, მესაკუთრემ კეთილი უნდა ინებოს და არსებული მდგომარეობა ერთიან სტანდარტში მოიყვანოს. ჩვენ შევიმუშავებთ საკრებულოსთან ერთად, რომ ელემენტარული მიწისქვეშა გადასასვლელით სარგებლობა იყოს ადამიანისთვის კომფორტული და არ იყოს ის სიტუაცია, რაც დღეს ვნახეთ. შეუძლებელია, პირბადის გარეშე გაიარო გადასასვლელი. ასევე მინდა მივმართო ახალგაზრდებსაც, მინდა, გამოვიყენო მათი ნიჭი, შევიმუშავებთ კონკრეტულ გეგმას, რომელიც გვირაბების მოხატვას ეხება. ერთადერთი, რაც ალამაზებს აქ არსებულ მდგომარეობას, ეს არის ამ ახალგაზრდების მიერ მოხატული კედლები, შესაბამისად მომდევნო დღეების განმავლობაში, ახალგაზრდებს შევთავაზებთ კონკრეტულ ადგილებს, სადაც უნდა განხორციელდეს მოხატვითი სამუშაოები.” – განაცხადა კახა კალაძემ.

“თბილსერვისის” ხელმღვანელის განცხადებით მიწისქვეშა გადასასვლელების მორეცხვა დღეიდან დაიწყება, რამდენიმე დღეში კი ელექტრო-გაყვანილობის პრობლემაც მოგვარდება. ლევან ჯღარკავას თქმით საჭირო გახდება შსს-ს დახმარებაც, რომ ვანდალიზმის ფაქტები აღარ განმეორდეს.