უხამსი კომენტარები, მიშტერება, სტვენა, ტელეფონის ნომრის ან შეხვედრის დაჟინებით მოთხოვნა დასჯადი გახდება - ახალი კანონპროექტი სექსუალურ შევიწროებაზე

პოლიტიკა - 12:50, 07 Nov, 2017

8131

მოქალაქეთა და არასამთავრობო ორგანიზაციათა პეტიცია ადამიანის უფლებათა დაცვის კომიტეტმა განიხილა. განცხადების ავტორების მთავარი მოთხოვნაა, სექსუალური შევიწროების კანონით აკრძალოს და დასჯად ქმედებად განსაზღვროს

პეტიციას ათასი მოქალაქე აწერს ხელს. პეტიციის ავტორთა განცხადებით, პარლამენტმა დაუყოვნებლივ უნდა განახორციელოს ცვლილებები „შრომის კოდექსსა“ და „ადმინისტრაციულ სამართალდარღვევათა კოდექსში“ და სექსუალური შევიწროება აიკრძალოს როგორც დასაქმების ადგილზე, ისე საჯარო სივრცეში.

“საჯარო სივრცეში სექსუალური შევიწროება მოიცავს: სექსუალური ხასიათის კომენტარებს, უხამს ხუმრობებს, მიშტერებას, სტვენას, ტელეფონის ნომრის ან შეხვედრის დაჟინებულ მოთხოვნას, რომელიც უარის შემდეგაც გრძელდება. ასევე სხეულზე შეხება უნებართვოდ, გენიტალიების ჩვენება და სხვა. სამუშაო ადგილას სექსუალური შევიწროება ხშირად გამოიხატება სექსუალური შინაარსის არასასურველ კომპლიმენტებში, ხუმრობებში, პორნოგრაფიის ჩვენებაში, უფროსის მხრიდან სექსუალური ურთიერთობების მოთხოვნა დაწინაურების ან სამსახურიდან არგაგდების სანაცვლოდ და სხვა. სექსუალური შევიწროების ამკრძალავი კანონმდებლობის არარსებობა იწვევს მოძალადეთა დაუსჯელობას და გენდერული ნიშნით დისკრიმინაციას”, - ნათქვამია პარლამენტში წარდგენილ პეტიციაში.

ადამიანის უფლებათა დაცვის კომიტეტმა პარლამენტში წარდგენილი პეტიციის განხილვა მიზანშეწონილად ჩათვალა და შემდგომი მსჯელობისთვისა გენდერულ საბჭოს გადაუგზავნა.