გამთენიისას საქართველოს საპარლამენტო დელეგაცია კიევში გაემგზავრა. საქართველოს პარლამენტის უკრაინის პარლამენტთან მეგობრობის ჯგუფის წევრები კიევში, უკრაინის უმაღლეს რადას ეწვევიან და ოფიციალურ შეხვედრებს გამართავენ.

დელეგაციის შემადგენლობაში არიან: მეგობრობის ჯგუფის ხელმძღვანელი გიორგი მოსიძე, ვიცესპიკერი სერგი კაპანაძე, პარლამენტარები კახა კუჭავა, დავით მათიკაშვილი, ირინა ფრუიძე, გელა სამხარაული და გოგი მეშველიანი.

8 ნოემბერს დელეგაციის წევრები ანტიტერორისტული ოპერაციის ზონას მოინახულებენ, 9-10 ნოემბერს კი გაიმართება შეხვედრები უმაღლესი რადის თავმჯდომარესთან, ანდრი პარუბისთან, საგარეო ურთიერთობათა კომიტეტის წევრებთან და მუდმივმოქმედი დელეგაციების ხელმძღვანელებთან, უკრაინის ვიცეპრემიერთან ევროინტეგრაციის საკითხებში, ივანა კლიმპუშ-ცინცაძესთან, აგრეთვე უკრაინის პარლამენტში საქართველოსთან მეგობრობის ჯგუფის წევრებთან და დიასპორის წარმომადგენლებთან.

„მთავარი ამ შეხვედრებში იქნება ის, რომ ჩვენ გავემგზავრებით დონეცკის რაიონში, სადაც ანტიტერორისტული ოპერაციის ზონას მოვინახულებთ, ზოგადად, ჩვენი პოლიტიკური ძალისთვის მნიშვნელოვანია უკრაინასთან სტრატეგიული ურთიერთობების ხაზგასმა, როგორც სიტყვებით, ისე ქმედებებით,“ - განაცხადა სერგი კაპანაძემ.