სახელმწიფო აუდიტის სამსახურმა დაიწყო სემინარი თემაზე: „აუდიტის ხარისხის უზრუნველყოფა“

პოლიტიკა - 13:08, 06 Nov, 2017

1014

სახელმწიფო აუდიტის სამსახურთან პარტნიორობით, საერთაშორისო ორგანიზაციამ - „უმაღლესი აუდიტორული ორგანოების განვითარების ინიციატივა“ (IDI) „აუდიტის ხარისხის უზრუნველყოფის“ სემინარი დაიწყო.

ღონისძიება, რომელშიც მსოფლიოს 30-მდე ქვეყნის უმაღლესი აუდიტორული ორგანიზაციების 60-ზე მეტი წარმომადგენელი მონაწილეობს, ოფიციალურად გენერალურმა აუდიტორმა, ირაკლი მექვაბიშვილმა გახსნა.

სემინარის მიზანია აუდიტის ხარისხის კონტროლის სისტემის გაუმჯობესება და თანამედროვე მეთოდოლოგიის დანერგვა უმაღლეს აუდიტორულ ინსტიტუტებში.

- სახელმწიფო აუდიტის სამსახურს აქვს პატივი, იყოს IDI-ის მიერ ორგანიზებული სემინარის - „აუდიტის ხარისხის უზრუნველყოფა“, პარტნიორი. ჩვენს პასუხისმგებლობას ზრდის ის ფაქტიც, რომ მსგავსი ფორმატისა და მასშტაბის შემაჯამებელი შეხვედრა კავკასიის რეგიონში პირველად ტარდება, - აღნიშნა გენერალურმა აუდიტორმა. ირაკლი მექვაბიშვილის განცხადებით, მსგავსი სამუშაო შეხვედრები უაღრესად მნიშვნელოვან როლს ასრულებს უმაღლესი აუდიტორული ინსტიტუტების მდგრადი განვითარების პროცესში, რადგან სწორედ აუდიტის ხარისხის გაუმჯობესება განსაზღვრავს აუდიტორული ორგანიზაციების სანდოობას, საიმედოობას, ობიექტურობას და ეფექტიანობას.

სემინარს, რომელიც 5 დღეს გაგრძელდება, წარუძღვებიან მოწვეული საერთაშორისო ექსპერტები, მათ შორის, საქართველოს წარადგენს სახელმწიფო აუდიტის სამსახურის ეკონომიკური საქმიანობის სფეროს აუდიტის დეპარტამენტის უფროსი, ექსპერტი თორნიკე შერმადინი.