ცესკო ახალი წესით დაკომპლექტდება

პოლიტიკა - 11:48, 06 Nov, 2017

1091

საქართველოს ცენტრალური საარჩევნო კომისია ახალი წესითა და შემადგენლობით დაკომპლექტდება. არჩევნების საბოლოო შედეგების გამოქვეყნების შემდეგ, ამოქმედდება პარლამენტის მიერ მიღებული კანონი. კერძოდ, ყველა დონის საარჩევნო კომისიაში წევრი მხოლოდ იმ საარჩევნო სუბიექტებს ეყოლება, რომელთაც პარლამენტის მანდატები მიიღეს და საპარლამენტო ფრაქცია შექმნეს.

“ქართული ოცნების“ გადაწყვეტილებით, როგორც ცესკოში, ასევე ყველა ქვედა დონის საარჩევნო კომისიაში პარტიების მიერ დასანიშნი წევრების რაოდენობა შვიდი წევრიდან 6-წევრამდე შემცირდა ამ ექვსი წევრიდან ცესკოში სამი წევრი ”ქართულ ოცნებას” ეყოლება, ხოლო თითო-თითო წევრს ”ნაციონალურ მოძრაობა”, ”ევროპული საქართველო” და ”პატრიოტთა ალიანსი” დანიშნავს.

აღსანიშნავია, რომ საარჩევნო კომისიებში წევრის დანიშვნა პარტიის მიერ სახელმწიფო ბიუჯეტიდან მიღებულ დაფინანსების ოდენობაზე იყო დამოკიდებული, რაც პარტიას ერთ წევრზე მეტის დანიშვნის შესაძლებლობას არ აძლევდა.

ამ დროის მონაცემით, 13-კაციან ცესკოში პარტიული კვოტით შვიდი სხვადასხვა პარტიის წარმომადგენელია დანიშნული.

“ქართული ოცნების“ მიერ მიღებული კანონის თანახმად, ცესკო შედგება თავმჯდომარისა და 11 წევრისაგან. ცესკოს თავმჯდომარე იმავდროულად არის ცესკოს წევრი. ცესკოს თავმჯდომარის უფლებამოსილების შეწყვეტა იმავდროულად იწვევს მისი წევრობის შეწყვეტას.

ცესკოს 5 წევრს საქართველოს პრეზიდენტის წარდგინებით ირჩევს საქართველოს პარლამენტი, ხოლო 6 წევრს ნიშნავენ პარტიები ამ კანონით დადგენილი წესით. (ამოქმედდეს 2017 წლის ადგილობრივი თვითმმართველობის ორგანოთა არჩევნების შედეგების შემაჯამებელი ყველა სახის ოქმის საქართველოს ცენტრალური საარჩევნო კომისიის მიერ დადგენილი წესით გამოქვეყნების მომდევნო დღიდან).