საქართველოს სამხედრო პოლიციის ყოფილი უფროსის, მეგის ქარდავას უკრაინელი ადვოკატი, მიხეილ ლოტოცკი აცხადებს, რომ ყოფილი მაღალჩინოსანის საქართველოსთვის გადმოცემის საკითხი დღის წესრიგში არ დგას.

ადვოკატის თქმით, უკრაინელ სამართალდამცავებს ჯერ ისიც კი არ აქვსთ დადგენილი არის თუ არა დაკავებული მეგის ქარდავა.

ლოტოცკი აღნიშნავს, რომ მისი დაცვის ქვეშ მყოფს უკრაინის ხელისუფლებისთვის პოლიტიკური თავშესაფარს მოთხოვნით არ მიუმართავს, თუმცა ადვოკატი მოთხოვნას არ გამორიცხავს.

"ჯერ-ჯერობით პოლიტიკური თავშესაფრის მოთხოვნის შესახებ არ გვისაუბრია. ის იმყოფება წინასწარი დაკავების იზოლატორში ქალაქ ივანოფრანკოვში. მისი დაკავების ორი ვერსია მაქვს: ოფიციალური ვერსიით მისი ჩხრეკა ჩატარდა მის საცხოვრებელ ბინაში. არაოფიციალური ინფორმაციით კი ის საზღვრის კვეთის დროს დააკავეს, შემდეგ მიიყვანეს ბინაში და ისე დააკავეს. ის რომ მას რამდენიმე პასპორტი ჰქონდა ტყუილია. არანაირი საბუთი არ ჰქონდა, შეიძლება სრულებითაც არ არის მეგის ქარდავა. ექსტრადირებაზე საუბარი ჯერ-ჯერობით არ მიდის ეს იქნება მხოლოდ მას შემდეგ, რაც საქართველოდან შესაბამისი საბუთები იქნება გამოგზავნილი. ახლა საუბარია მხოლოდ პატიმრობაზე, რომ ის არ მიიმალოს. არ გვისაუბრია რას აკეთებდა საქართველოში. უკრაინაში კი უბრალოდ ცხოვრობდა და არაფერს არღვევდა"- აღნიშნა ადვოკატმა.