2018 წლის სახელმწიფო ბიუჯეტზე დღეს პარლამენტის პლენარულ სხდომაზე იმსჯელებენ. დოკუმენტს დეპუტატებს დიმიტრი ქუმსიშვილი წარუდგენს. 2018 წლის ფინანსური დოკუმენტი 12 მილიარდ 403 მილიონი ლარით განისაზღვრა. დოკუმენტი 4.5 პროცენტიანი ეკონომიკური ზრდის მიხედვითაა დაგეგმილი. საბიუჯეტო დეფიციტი კი 3 პროცენტზეა გათვლილია.

“გადამუშავებული ვერსია ითვალისწინებს ასიგნენებს 12 მილიარდ 403 მილიონით. ეს იქნება ხარჯვა 2018 წლის სახელმწიფო ბიუჯეტის. პრაქტიკულად, ეს არის 987 მილიონით მეტი, ვიდრე სახელმწიფო ბიუჯეტით 2017 წელს გვაქვს დაგეგმილი. ეს ნიშნავს, რომ მთლიანი შიდა პროდუქტი გაიზრდება 2018 წელს 4.5%-ით,“ - განაცხადა ირაკლი კოვზანაძემ.

ბიუჯეტში გათვალისწინებული არ არის პენსიისა და სოციალური დახმარების ზრდა. „ნაციონალური მოძრაობა“ ხელისუფლებას საკუთარი მოქალაქეების უგულებელყოფაში ადანაშაულებს.

„არცერთი თეთრით არ იზრდება პენსია, რატომ არ იზრდება თუნდაც 10 ლარით. ეს ხომ არ არის ბევრი, რატომ არ იზრდება თუნდაც მომავალი წლის ნოემბერ-დეკემბერში, რომ ეს ზრდა გარანტია იქნებოდა იმისა, რომ 2019-ში მაინც გაიზრდება. ფაქტობრივად, დაივიწყეს პენსიონერები და ალბათ პენსიას გაზრდიან 2020 წლის საპარლამენტო არჩევნების წინ,“ - აცხადებს რომან გოცირიძე.

2018 წლის სახელმწიფო ბიუჯეტს აკრიტიკებენ „ევროპული საქართველოს“ წევრებიც:

„ეს ბიუჯეტი ვერ პასუხობს ვერანაირად ძირითად სირთულეს და გამოწვევას, რაც აქვს საქართველოს. ეს არის სიღარიბის მაღალი დონე, დაბალი შემოსავლები, მაღალი უმუშევრობის დონე და ა.შ. გარდა ამისა, პენსია არ იზრდება, სოციალური დახმარება არ იზრდება,“ - ამბობს გიგი წერეთელი.

საბოლოო კენჭისყრა მომავალი წლის ბიუჯეტზე დეკემბერში გაიმართება.