რამდენიმე დღის წინ ყოფილ პრემიერ მინისტრს ვანო მერაბიშვილს სასჯელაღსრულების დაწესებულებაში ვადაზე ადრე გათავისუფლების შესახებ უწყება მიუტანეს და განუმარტეს, რომ დღეიდან მას ამ მექანიზმით სარგებლობის უფლება გააჩნია. ინფორმაციას "პრაიმტაიმი" ავრცელებს.

გამოცემის ინფორმაციით, სასჯელაღსრულებისა და პრობაციის სამინისტროსთან მოქმედი ე.წ. უდოს კომისია მერაბიშვილის საკითხზე უახლოეს ხანში იმსჯელებს. სავარაუდოდ, ყოფილი პრემიერ მინისტრი საპყრობილეს ახალ წლამდე დატოვებს.

აღნიშნულს „ნაციონალური მოძრაობის“ წევრი ნუგზარ წიკლაური სოციალური ქსელის მეშვეობით ეხმაურება:

“ვანო მერაბიშვილი პოლიტიკური პატიმარია.

მისი უკანონო პატიმრობის ხუთი წლის თავზე ამ ჭეშმარიტებაში დარწმუნდნენ საქართველოს მოქალაქეებიც და საერთაშორისო ორგანიზაციებიც.

ახლა ვრცელდება ცნობა ვანო მერაბიშვილის შესაძლო გათავისუფლების თაობაზე, რაც უდაოდ ერთადერთი სწორი ნაბიჯი იქნებოდა. ივანიშვილის კორუმპირებული მმართველობის მხრიდან.

ამასთან, დაუჯერებელია, რომ ე.წ. უდოს კომისიამ, რომელიც მთლიანად ოლიგარქის პოლიტიკური ზეგავლენის ქვეშაა და მის პოლიტიკურ იარაღს წარმოადგენს, მიიღოს გათავისუფლების გადაწყვეტილება.

პოლიტიკური დევნა აუცილებლად დასრულდება და მის შემოქმედ ივანიშვილს აუცილებლად მოეთხოვება პასუხი.

მანამდე კი, სოლიდარობა ყველა პოლიტიკურ პატიმარს.

მათი ბრძოლა თავისუფლების დღესთან გვაახლოებს”, - წერს ნუგზარ წიკლაური.