"ვინც "წესიერად" იქცევა და ივანიშვილის ერთგულია, მათთვის სათათბურე პირობები იქმნება" - თარხნიშვილი ოპოზიციის დასუსტების სქემაზე საუბრობს

პოლიტიკა - 14:37, 01 Nov, 2017

825

ოპოზიოცია ბიძინა ივანიშვილსა და მმართველ პოლიტიკურ პარტიას სატელიტი პარტიების სათათბურე პირობებში ჩაყენებისთვის აკრიტიკებს.
როგორც "ნიუპოსტს" "ევროპული საქართველოს" ერთ-ერთმა ლიდერმა ლევან თარხნიშვილმა განუცხადა, სიმონ ნოზაძისა და გია ჟორჟოლიანის საკანონმდებლო ინიციატივა ამის ათელი მაგალითია.

"რამდენიმე წელიწადია ბიძინა ივანიშვილი და "ქართული ოცნება" ცდილობენ თავიანთი მომხრეები, პარტნიორი პარტიები პრივილეგირებულ მდგომარეობაში ჩააყენოს და ბიუჯეტის ხარჯზე დააფინანსოს. შეგახსენებთ, რომ ქართულმა ოცნებამ გამარჯვებისთანავე შეიქმნა ახალი სიპ-ებისა და აიპ-ების შექმნა, ბიუროკრატიის გაზრდა, სადაც ქართული ოცნების აქტივისტები და ლიდერთა ნათესავები არიან დასაქმებულნი.
მეორე ეტაპი კანონმდებლობის საკუთარ თავზე მორგება იყო. პირველი მაგალითი გახლდათ როცა "მრეწველობა გადაარჩენს საქართველოს", "მწვანეთა პარტიას" და "სოციალ-დემოკრატებს" ხელოვნურად შეუქმნეს ფრაქციები და მისცეს დამატებითი დაფინანსება. როგორც იცით "მრეწველებმა" 3%-იანი ზღვარი ვერ გადალახეს და შესაბამისად საბაზისო ფინანსების გარეშე დარჩნენ. სწორედ ამას ემსახურება ეს ცვლილებები.
ასევე თავის დროზე ხელოვნურად მოხდა ის, რომ ფრაქციის შექმნით მრეწველობა გადაარჩენს საქართველოს გადაასწრებინეს თანხებით ალასანიას ყოფილ პარტიას და ცენტრალურ საარჩევნო კომისიაში, ადმინისტრაციაში მრეწველებმა მიიღეს ადგილი. ამ ყველაფრით ხდება სხვა პარტიების დასუსტება: შეგახსენებთ ბლოკის აკრძალვას, შეგახსენებთ იმასაც რომ არაფრით დათანხმდნენ პროპორციულ სისტემაზე გადასვლას, არ დათანხმდნენ ბარიერის დაწევაზე, შესაბამისად იქმნება სურათი რომ პოლიტიკური პარტიებისთვის ზოგადი გარემო უარესდება, ხოლო ის ვინც "წესიერად" იქცევა და ბიძინა ივანიშვილის ერთგულია მათთვის სათათბურე პირობები იქმნება"- აღნიშნა ლევან თარხნიშვილმა.

პარლამენტს დეპუტატების სიმონ ნოზაძისა და გია ჟორჟოლიანის საკანონმდებლო ინიციატივის მიხედვითპარტია, რომელიც არჩევნებში 3%-იან ბარიერს ვერ გადალახავს, შესაძლოა კვალიფიციური სუბიექტი გახდეს და მიიღოს სახელმწიფო დაფინანსება. ინიციატივის თანახმად, ეს შესაძლებელია იმ შემთხვევაში თუკი პარტიის წარმომადგენელი მოხვდება პარლამენტში და ფრაქციის ფორმირებას შეძლებს.