პარლამენტის ვიცე-სპიკერი თამარ ჩუგოშვილი კონსტიტუციაში შესატან ცვლილებებთან დაკავშირებით ოპოზიციის ბოიკოტს არასერიოზულს და უპასუხისმგებლოს უწოდებს.

„ოპოზიციამ უნდა გასცეს მარტივ კითხვას პასუხი, მე არ მაქვს პასუხი გასაცემი, მათ აქვთ პასუხი გასაცემი - უნდათ ეს ცვლილებები, თუ არ უნდათ ეს ცვლილებები. ერთადერთი კითხვა გვაქვს ჩვენ მათთან, თქვან უნდათ თუ არ უნდათ. მე ვფიქრობ, რომ მათ მხრიდან უკიდურესად არასერიოზული დამოკიდებულება არის და კიდევ ერთხელ თქვან უნდათ თუ არ უნდათ ცვლილებები და მერე გადაწყვიტონ ბოიკოტზე გადიან თუ არ გადიან. მე მგონი ამაზე კითხვებიც არ ჩნდება, პოზა არის და სრულიად უპასუხისმგებლო,“-განაცხადა თამარ ჩუგოშვილმა.

ქვეყნის მთავარ კანონში 4 პუნქტი იცვლება. მმართველი პარტია 2024 წლიდან ე.წ. ბონუსების სისტემას აუქმებს. 2020 წელს ერთჯერადად პარტიებს საარჩევნო ბლოკების შექმნის შესაძლებლობა ექნებათ. ორი ცვლილება კი ტექნიკური იქნება, რაც აღმსარებლობის თავისუფლებისა და საკონსტიტუციო სასამართლოს მიერ არჩევნების შედეგების გაუქმების საკითხებს დაარეგულირებს. „ქართული ოცნება“ დღევანდელ ბიუროს სხდომაზე ახალ კონსტიტუციაში ცვლილებების ინიცირებას გეგმავს. როგორც ცნობილია, მმართველი გუნდი საკონსტიტუციო ცვლილებებთან დაკავშირებულ პროცედურებს თავიდან გაივლის. შეიქმნება ახალი კომისია. განხილვები მთავარი ოპოზიციური ძალების გარეშე ჩაივლის. მათ კომისიის მუშაობას ბოიკოტი გამოუცხადეს.