საქართველოს საგარეო საქმეთა მინისტრი მიხეილ ჯანელიძე ფეხბურთელ გურამ კაშიას გარშემო ატეხილ სკანდალს და „ქართული მარშის“ აქციას ფეისბუკზე ეხმაურება:

მსურს სრული სოლიდარობა გამოვუცხადო ქართველ ფეხბურთელებს და ფეხბურთის ფედერაციას.

ყოვლად მიუღებელია, რომ ადამიანები, რომელთაც სახელი გაუთქვეს ჩვენს ქვეყანას და საქართველოს პოზიტიურ იმიჯს ამკვიდრებენ მსოფლიოში საკუთარი დაუღალავი შრომით, გახდნენ მსხვერპლი გაუგებარი ადამიანებისა და ჯგუფების შეტევის.

მნიშვნელოვანია ქართული საზოგადოების მტკიცე და ერთსულოვანი პასუხი.

ვერავინ ვნახე დღეს აქციაზე მისული ისეთი, ვისაც იმის მეათედი სიკეთე მაინც ჰქონდეს მოტანილი ქვეყნისთვის, რასაც მათ მიერ შეურაცხყოფილი ადამიანები აკეთებენ.“- წერს მიხეილ ჯანელიძე.

შეგახსენებთ, საქართველოს ნაკრების გამორჩეული ფეხბურთელი და ნიდერლანდების ქალაქ არნემის "ვიტესის" კაპიტანი გურამ კაშია თანასწორობის კამპანიის ფარგლებში ერთ-ერთ მატჩზე ლგბტ დროშის სამკლაურით წარსდგა, თუმცა ამის შემდეგ ძალადობის წინააღმდეგ კამპანიაში მონაწილე ფეხბურთელი საკუთარ სამშობლოში გარკვეული ადამიანების მხრიდან თავად გახდა სიტყვიერი ძალადობის ადრესატი. ე.წ „ქართული მარშის“ წევრები კაშიას ქართული ტრადიციების შეურაცხყოფაში და ლგბტ პროპაგანდაში ადანაშუალებენ და მის „ეროვნული ნაკრებიდან მოკვეთას“ ითხოვენ, ამ მოთხოვნით მათ გუშინ ფეხბურთის ფედერაციასთან აქციაც გამართეს, რომელიც პოლიციასთან დაპირისპირებით დასრულდა, რის შედეგადაც აქციის 6 მონაწილე დააკავეს.

კაშიას მხარდაჭერა გამოუცხადა საზოგადოების უმრავლესობამ, მათ შორის როგორც ვეტერანმა ასევე მოქმედმა ფეხბურთელებმაც.