"მარტივი კითხვა მაქვს, რა დააშავა კაშიამ?"- კახა კალაძე გურამ კაშიას საკითხს კიდევ ერთხელ გამოეხმაურა

პოლიტიკა - 15:00, 31 Oct, 2017

10262

საქართველოს ნაკრების გამორჩეული ფეხბურთელის და ნიდერლანდების ქალაქ არნემის "ვიტესის" კაპიტნის გურამ კაშიას მისამართით აგორებულ ნეგატიურ ტალღას თბილისის მერობის არჩევნებში გამარჯვებული კანდიდატი, ვეტერანი ფეხბურთელი კახა კალაძე კიდევ ერთხელ გამოეხმაურა. კალაძის თქმით მისთვის გაუგებარია კაშიას ნაკრებიდან გარიცხვის მოთხოვნა და ის პრეტენზიები, რომელიც საზოგადოების გარკვეულ ნაწილს კაშიას მიმართ აქვთ.

"არ ვიცი რატომ უნდა გაირიცხოს, მარტივი კითხვა მაქვს, რა დააშავა კაშიამ?. მე ამასთან დაკავშირებით რამდენჯერმე გავაკეთე განცხადება. კიდევ ერთხელ გავიმეორებ, რომ მიუხედავად სარწმუნოებისა, მიუხედავად სექსუალური ორიენტაციისა, ნებისმიერ ადამიანს აქვს უფლება გამოხატოს თავისი ხედვები, დააფიქსიროს თავისი აზრი."- განაცხადა კალაძემ.

"ვიტესის" კაპიტანი გურამ კაშია ერთ-ერთ მატჩზე ლგბტ დროშის სამკლაურით წარსდგა. ამ ნაბიჯით ის შეუერთდა Stonewall-ის თანასწორობის კამპანიას, რომელიც ლგბტ ადამიანების უფლებების დაცვას ეძღვნება. ფეხბურთელის ამ ქმედებას საქართველოში არაერთგვაროვანი რეაქცია მოჰყვა. ადამიანების გარკვეულმა ჯგუფმა კაშია ქართული ტრადიციების შეურაცხყოფაში დაადანაშაულა და მისი „ეროვნული ნაკრებიდან მოკვეთა“ მოითხოვა. ამ მხრივ განსაკუთრებული „ასავალ-დასავალის“ ჟურნალისტი გიორგი გიგაური გამოირჩეოდა. გურამ კაშიას წინააღმდეგ აგორებულ ნეგატიურ ტალღას დიდი გამოხმაურება მოჰყვა ქართულ სპორტულ საზოგადოებაში, კაშიას მხარდაჭერა გამოუცხადეს, როგორცვეტერანმა ასევე მოქმედმა ფეხბურთელებმაც.