"შეიქმნება სპეციალური კომისია, რომელიც ერთი თვის განმავლობაში საკონსტიტუციო ცვლილებებთან დაკავშირებით იმუშავებს"

"შეიქმნება სპეციალური კომისია, რომელიც ერთი თვის განმავლობაში საკონსტიტუციო ცვლილებებთან დაკავშირებით იმუშავებს" - კობახიძე

პოლიტიკა - 15:07, 30 Oct, 2017

892

საქართველოს პარლამენტის თავმჯდომარის ირაკლი კობახიძის განცხადებით, მოქმედი კანონმდებლობით შეიქმნება სპეციალური კომისია, რომელიც ერთი თვის განმვალობაში საკონსტიტუციო ცვლილებებზე იმუშავებს.

„მოქმედი კანონმდებლობის თანახმად, შეიქმნება სპეციალური კომისია, რომელიც დაახლოებით ერთი თვის განმავლობაში გააგრძელებს მუშაობას და ამის შემდეგ, უკვედაიწყება საპარლამენტო განხილვები. რაც შეეხება საკონსტიტუციო ცვლილებებს, საქმე ეხება მხოლოდ ოთხ საკითხს, რაზეც შევთანხმდით ჩვენ ვენეციის კომისიასთან, საუბარია ბონუსის თემის გაუქმებაზე, ბლოკების ერთჯერადად დატოვებაზე, ასევე, ზუსტდება რწმენის თავისუფლებასთან დაკავშირებული ჩანაწერი და ასევე ზუსტდება ჩანაწერი, რომელიც შეეხება საკონსტიტუციო სასამართლოს უფლებამოსილებებს არჩევნებთან დაკავშირებით. ეს არის ოთხი ცვლილება, რომელიც შევა კონსტიტუციაში“,- განაცხადა პარლამენტის თავმჯდომარემ.

მისივე თქმით, კომისიის მიერ მომზადებულ დოკუმენტს პარლამენტი მესამე მოსმენით მარტში განიხილავს. ირაკლი კობახიძემ კიდევ ერთხელ აღნიშნა, რომ კონსტიტუციასთან დაკავშირებით კონსულტაციები დასრულებულია და საუბარია კონკრეტულ შეთანხმებაზე, რომლის აღსრულებას პარლამენტი ვენეციის კომისიასთან ერთად უზრუნველყოფს.

„ჩვენ დეკემბერში გვექნება ორი მოსმენა, ხოლო მარტის თვეში მესამე მოსმენა. ეს არის კიდევ ერთხელ, ის საკითხები, რომლებზეც შევთანხმდით ჩვენ ვენეციის კომისიასთან და ამ შეთანხმების შესაბამისად შეიცვლება კონსტიტუციაში ნორმები. კონსულტაციები კონსტიტუციასთან დაკავშირებით არის დასრულებული, გვაქვს კონკრეტული შეთანხმება რომლის აღსრულებასაც უზრუნველყოფს პარლამენტი ვენეციის კომისიასთან ერთად“,- განაცხადა ირაკლი კობახიძემ.

მისივე თქმით, განხილვებში მოქმედი კანონმდებლობის შესაბამისად, ყველა მხარე იქნება ჩართული.

ყველა იქნება ჩართული განხილვებში მოქმედი კანონმდებლობის შესაბამისად, თუმცა, ხაზს გავუსვამ იმას, რომ კონსტიტუციის შინაარსთან დაკავშირებით დისკუსია არის ამოწურული - საქმე ეხება ოთხ საკითხს, რომელზეც ვენეციის კომისიასთან შევთანხმდით“,- განაცხადა პარლამენტის თავმჯდომარემ.